त्रिदेशीय टी–२० अन्तिम खेलमा आज स्कटल्यान्डसँग भिड्दै नेपाल, नेदरल्यान्ड्समाथिको शानदार जितपछि शृंखला कब्जाको लक्ष्य

काठमाडौं । स्कटल्यान्डमा जारी त्रिदेशीय टी–२० क्रिकेट शृङ्खलाअन्तर्गत आज हुने अन्तिम खेलमा नेपालले घरेलु टोली स्कटल्यान्डको सामना गर्दैछ । पछिल्ला दुई खेलमा लगातार जित हात पारेको नेपाल आजको खेल जित्दै उपाधि आफ्नो नाम गर्न चाहन्छ ।

बिहीबार राति सम्पन्न खेलमा नेपालले नेदरल्यान्ड्सलाई ६ विकेटले पराजित गर्दै महत्वपूर्ण दुई अंक जोडेको थियो । यस जितसँगै नेपाल चार अंकसहित अंकतालिकाको शीर्ष स्थानमा उक्लिएको छ ।

टस जितेर पहिले फिल्डिङ रोजेको नेपालले डच टोलीलाई २० ओभरमा ७ विकेटको क्षतिमा १७४ रनमै सीमित गर्‍यो । जवाफमा १७५ रनको लक्ष्य नेपालले १९.४ ओभरमै ४ विकेट गुमाएर पुरा गर्‍यो ।

ओपनर कुशल भुर्तेलले आक्रामक ब्याटिङ गर्दै ५१ बलमा ६ चौकाको मद्दतमा ६५ रन बनाए । आरिफ शेखले ३९ रनको योगदान गर्दा भिम सार्कीले २७ रन बनाए । अन्तिमतिर दीपेन्द्रसिंह ऐरीले अविजित १६ रन र लोकेश बमले अविजित १२ रन जोडे ।

नेदरल्यान्ड्सका बलरहरू मध्ये बेन फ्लेचर, आर्यन दत्त, ज्याक कासे र भान डर मेर्वेले एक–एक विकेट लिए ।

यसअघि ब्याटिङमा ओर्लिएको नेदरल्यान्ड्सका लागि माइकल लेभिटले ५३ बलमा ६ चौका र ५ छक्कासहित ८६ रन बनाएका थिए भने भान डर मेर्वे ३६ रनमा अविजित रहे ।

नेपालका बलिङतर्फ करण केसीले उत्कृष्ट प्रदर्शन गर्दै ४ ओभरमा २ विकेट लिए । अन्य चार बलर – ललित राजवंशी, दीपेन्द्रसिंह ऐरी, रुपेश सिंह र सन्दीप लामिछानेले एक–एक विकेट लिए ।

पहिलो खेलमा सुपर ओभरमा नेदरल्यान्ड्ससँग हार बेहोरेको नेपालले बिहीबारको जितसँगै त्यो हारको बदला पनि चुकाएको छ ।

अब आजको खेलमा नेपाल स्कटल्यान्डलाई हराउन सके शृंखलाको विजेता बन्नेछ। डबल राउन्ड रोविन फर्म्याटमा भइरहेको शृंखलामा शीर्ष स्थानमा रहने टोलीले उपाधि जित्नेछ ।