अमेरिकासँग हारेपछि स्कटल्यान्डले शीर्ष स्थानमा पुग्ने अवसर गुमायो

काठमाडौं । आईसीसी विश्वकप लिग–२ अन्तर्गत नेपालमा जारी त्रिकोणात्मक एकदिवसीय शृंखलामा स्कटल्यान्डले आफ्नो अन्तिम खेलमा अमेरिकासँग हार बेहोरेको छ । बुधबार कीर्तिपुरस्थित त्रिवि क्रिकेट मैदानमा भएको खेलमा अमेरिका ६ विकेटले विजयी भयो ।

यस हारसँगै स्कटल्यान्डले लिग–२ को शीर्ष स्थानमा पुग्ने अवसर गुमाएको छ । ३२ खेलबाट १६ जित र १० हारसहित ३८ अंक जोडेको स्कटल्यान्ड तालिकाको दोस्रो स्थानमा सीमित भएको छ । समान ३८ अंक भए पनि राम्रो नेट रनरेटका आधारमा अमेरिका शीर्ष स्थानमा उक्लिएको हो । अमेरिकाले २७ खेलमध्ये १९ मा जित निकालेको छ ।

नेपाल भ्रमणका क्रममा स्कटल्यान्डले दुई जित र दुई हारसहित चार अंक संकलन गर्‍यो । उसले सुरुआती दुई खेलमा नेपाल र अमेरिकालाई डीएलएस विधिबाट समान दुई रनले पराजित गरेको थियो । त्यसपछि नेपाल र अमेरिकासँग समान ६ विकेटको हार बेहोरेको हो ।

बुधबार स्कटल्यान्डले दिएको १७० रनको लक्ष्य अमेरिकाले २७।१ ओभरमै चार विकेट गुमाएर पूरा गर्‍यो । अमेरिकाका ओपनर स्मिथ पटेल र सयान जहानगिरले समान ३७ रन जोडे । कप्तान साइतेजा मुक्कमल्लाले ३५ रन बनाए भने मिलिन्द कुमार २४ र शुभम रन्जाने ११ रनमा अविजित रहे । सेहान जयसुर्या १९ रनमा रनआउट भए ।

स्कटल्यान्डका लागि ज्याक जार्भिस, ओलिभर डेविडसन र माइकल लिस्कले एक–एक विकेट लिए ।

यसअघि टस जितेर पहिले ब्याटिङ गरेको स्कटल्यान्ड ४३.३ ओभरमा १६९ रनमा समेटिएको थियो । टोलीका लागि मार्क वाटले सर्वाधिक ६६ रन बनाए । उनले ८५ बलमा चार चौका र तीन छक्का प्रहार गरे । ब्रान्डोन म्याकमुलेनले ३२ रन जोडे भने जर्ज मुन्से १९ रनमा आउट भए । अन्य ब्याटरले उल्लेखनीय योगदान दिन सकेनन् ।

अमेरिकाका रुसिल उगाकारले चार विकेट लिए । सौरभ नेत्रवाल्करले तीन तथा शुभम रन्जानेले दुई विकेट लिए भने हरमित सिंहले एक विकेट हात पारे ।

शृंखलाको अन्तिम खेल शुक्रबार नेपाल र अमेरिकाबीच हुनेछ ।