देशभर बदली रहने, केही स्थानमा भारी वर्षाको सम्भावना

काठमाडौं । देशभर आज मौसम सामान्यदेखि पूर्णतया बदली रहने छ । जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार देशका विभिन्न भू–भागमा मेघगर्जन र चट्याङसहित वर्षा हुने सम्भावना रहेको छ ।

दिउँसो हिमाली तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने पूर्वानुमान गरिएको छ । लुम्बिनी र सुदूरपश्चिम प्रदेशका तराई क्षेत्रमा केही स्थान तथा मधेश, कोशी, बागमती र गण्डकी प्रदेशका तराई भू–भागका थोरै स्थानमा पनि मध्यम वर्षाको सम्भावना रहेको छ ।

महाशाखाले दिउँसो कोशी र बागमती प्रदेशका हिमाली तथा पहाडी भू–भागमा वर्षाको सम्भावना रहेको जनाएको छ । त्यस्तै, गण्डकी, कर्णाली र सुदूरपश्चिम प्रदेशका पहाडी क्षेत्रका एक–दुई स्थानमा भारी वर्षा हुन सक्ने अनुमान गरिएको छ ।

रातिको समयमा पनि देशभर मौसम सामान्यतया बदली नै रहनेछ । कोशी, बागमती र गण्डकी प्रदेशका हिमाली भू–भागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली क्षेत्रमा थोरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको महाशाखाले जनाएको छ ।

राति पहाडी तथा तराई भू–भागका केही स्थानमा समेत मेघगर्जन र चट्याङसहित मध्यम वर्षा हुन सक्नेछ । विशेषगरी कोशी प्रदेशको तराई भू–भागका एक–दुई स्थानमा भारी वर्षा हुन सक्ने पूर्वानुमान गरिएको छ ।

वर्षा र चट्याङको सम्भावना रहेका क्षेत्रमा आवश्यक सतर्कता अपनाउन महाशाखाले सर्वसाधारणलाई आग्रह गरेको छ । भारी वर्षाको सम्भावना भएका स्थानमा यात्रा तथा दैनिक गतिविधि गर्दा मौसमको अवस्था हेरेर सावधानी अपनाउनसमेत अनुरोध गरिएको छ ।