काठमाडौंका होटल–रेस्टुरेन्टमा छुट्टै धुम्रपान क्षेत्र अनिवार्य, उल्लंघन गरे कारबाही हुने

काठमाडौं । जिल्ला प्रशासन कार्यालय, काठमाडौंले होटल तथा रेस्टुरेन्टहरूमा धुम्रपानका लागि छुट्टै र व्यवस्थित स्थानको व्यवस्था गर्न निर्देशन दिएको छ । बुधबार ‘अत्यन्त जरुरी सूचना’ जारी गर्दै प्रशासनले सार्वजनिक स्थानमा जथाभावी धुम्रपान गरिँदा धुम्रपान नगर्ने व्यक्तिको स्वास्थ्यमा प्रतिकूल असर परेको भन्दै यस्तो व्यवस्था गर्न आग्रह गरेको हो ।

प्रशासनका अनुसार होटल तथा रेस्टुरेन्टमा हुक्का, चुरोटलगायतका सूर्तिजन्य पदार्थको अव्यवस्थित प्रयोग भइरहेको तथा विद्यमान कानुनी व्यवस्था पालना नभएको भन्दै कार्यालयमा विभिन्न गुनासा प्राप्त भएका छन् । त्यसैले सबै व्यवसायीलाई सूर्तिजन्य पदार्थ (नियन्त्रण तथा नियमन) ऐन, २०६८ को व्यवस्था कार्यान्वयन गर्न निर्देशन दिइएको हो ।

सूचनामा धुम्रपान गर्न पाइने र नपाइने स्थान स्पष्ट रूपमा छुट्याउनुपर्ने उल्लेख गरिएको छ । साथै धुम्रपान गर्ने क्षेत्र चारैतिरबाट बन्द हुने गरी बनाउनुपर्ने र त्यसको धुवाँ वा असर अन्य ग्राहक वा कर्मचारीसम्म नपुग्ने व्यवस्था मिलाउन प्रशासनले भनेको छ ।

सहायक प्रमुख जिल्ला अधिकारी मुक्तिराम रिजालद्वारा हस्ताक्षरित जारी सूचनामा यस निर्देशनको कार्यान्वयन भए–नभएको अनुगमन गरिने र कानुन विपरीत काम गर्ने होटल तथा रेस्टुरेन्टमाथि सूर्तिजन्य पदार्थ (नियन्त्रण तथा नियमन) ऐन, २०६८ को दफा १७ बमोजिम आवश्यक कारबाही गरिने चेतावनी समेत दिइएको छ ।