नाउपाको राष्ट्रिय भेला बानेश्वरमा जारी, अध्यक्ष रञ्जिता अनुपस्थित

काठमाडौं । नागरिक उन्मुक्ति पार्टी (नाउपा) ले अध्यक्ष रञ्जिता श्रेष्ठ चौधरीविरुद्धको अनुशासन कारबाही अनुमोदन गर्न राष्ट्रिय भेला बोलाएको छ । राजधानीको मध्यबानेश्वरमा जारी भेलामा अध्यक्ष रञ्जिता भने अनुपस्थित छन् ।

लिचीबारी घुसकाण्डमा मुछिएपछि चौधरीमाथि पार्टी अनुशासन समितिले कारबाही प्रक्रिया अघि बढाएको थियो । उक्त समितिको संयोजकत्व रामलाल डगौरासहित सुनिता चौधरी र पुण्य बुढाले समितिबाट चौधरीलाई २४ घण्टे स्पष्टीकरण सोधेका थिए । समयमै स्पष्टीकरण नआएपछि चौधरीलाई अध्यक्ष पदबाट हटाइएको नाउपाले जानकारी दिएको छ ।

उनलाई हटाएको पत्र मंगलबार निर्वाचन आयोगमा दर्ता गरिएको छ । पार्टीले हाल पोखराकै शिव बास्तोलालाई कार्यवाहक अध्यक्ष तोकेको भए पनि त्यसबारे पार्टीभित्र मतभेद देखिएको छ ।

राष्ट्रिय भेलाले अनुशासन समितिको निर्णय अनुमोदन गर्नुका साथै चौधरीपछिको नेतृत्व, संगठनात्मक जिम्मेवारी तोक्ने, तथा आगामी दिशा तय गर्ने जस्ता एजेन्डामा छलफल गरिरहेको एक नेताले जनाए ।

भेलामा केन्द्रीय सदस्य, संघीय तथा प्रदेश सांसदलगायतका नेता सहभागी छन् ।