उपत्यकामा बर्डफ्लु फैलिँदै, पाँच लाखभन्दा बढी पन्छी नष्ट

काठमाडौं । काठमाडौं उपत्यकासहित देशका विभिन्न जिल्लामा बर्डफ्लु (H5H1) संक्रमण तीव्र रूपमा फैलिएको छ । पछिल्लो तीन महिनामा ११ जिल्लाका ८२ स्थानमा संक्रमण पुष्टि भइसकेको भन्दै पशुसेवा विभागले प्रभावित क्षेत्रमा उच्च सतर्कता अपनाएको जनाएको छ ।

विभागका अनुसार विसं २०८२ चैत ४ गते मोरङमा पहिलोपटक बर्डफ्लु पुष्टि भएको थियो । त्यसयता झापा, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेपलाञ्चोकसम्म संक्रमण फैलिएको हो ।

संक्रमण नियन्त्रणका क्रममा हालसम्म पाँच लाख ६९ हजार ८५८ वटा पन्छी नष्ट गरिएको विभागका महानिर्देशक डा. उमेश दाहालले जानकारी दिए । त्यस्तै नौ लाख ८९ हजार ३१३ वटा अण्डा र एक हजार ९५४.८५ क्विन्टल दाना पनि नष्ट गरिएको उनले बताए ।

रोग नियन्त्रणलाई प्रभावकारी बनाउन विभागले उपमहानिर्देशकको नेतृत्वमा ‘बर्डफ्लु रोग नियन्त्रण कक्ष’ गठन गरी संघ, प्रदेश र स्थानीय तहसँग समन्वय गर्दै प्राविधिक टोली परिचालन गरेको जनाएको छ ।

विभागका अनुसार कोशी प्रदेशका मोरङ, झापा, सुनसरी तथा बारा, महोत्तरी, चितवन र नवलपरासीमा संक्रमण नियन्त्रणमा आइसकेको छ । तर काठमाडौं, भक्तपुर, ललितपुर र काभ्रेपलाञ्चोकका केही क्षेत्रमा अझै संक्रमण देखिएकाले निगरानी र नियन्त्रणका उपाय थप कडाइका साथ लागू गरिएको छ ।

संक्रमित भाइरसमा आनुवंशिक परिवर्तन (म्युटेसन) भएको छ वा छैन भन्ने यकिन गर्न राष्ट्रिय जनस्वास्थ्य प्रयोगशालासँगको सहकार्यमा भाइरसको जिन अनुक्रमण (जिनोम सिक्वेन्सिङ) प्रक्रिया पनि सुरु गरिएको विभागले जनाएको छ ।

विभागले किसानलाई फार्ममा जैविक सुरक्षा (बायोसेक्युरिटी) का मापदण्ड अनिवार्य रूपमा पालना गर्न आग्रह गरेको छ । पुराना अण्डाका क्रेट पुनः प्रयोग नगर्न, ढुवानीका साधन पूर्ण रूपमा निसंक्रमण गरेर मात्र फार्ममा प्रवेश गराउन तथा जङ्गली र घरपालुवा पन्छीबीचको सम्पर्क रोक्न पनि विभागले अनुरोध गरेको छ ।

यस्तै, पन्छी तथा पन्छीजन्य उत्पादनको ओसारपसार गर्दा अनिवार्य रूपमा भेटेरिनरी प्रमाणपत्र लिन, नियमित खोप लगाउन र कुनै फार्ममा अस्वाभाविक रूपमा धेरै पन्छी बिरामी वा मरेको देखिए तत्काल नजिकको पशुसेवा कार्यालयमा जानकारी गराउन विभागले सबै पन्छीपालकलाई अपिल गरेको छ ।