महाराजगन्ज प्रहरी हत्या प्रकरणमा थप पाँच जना पक्राउ

काठमाडौं । जेनजी आन्दोलनका क्रममा प्रदर्शनकारीको आक्रमणबाट ज्यान गुमाएका असई मिलन राय र जवान उत्तम थापाको हत्यामा संलग्न आरोपमा प्रहरीले थप पाँच जना युवालाई पक्राउ गरेको छ ।

पक्राउ पर्नेमा गोरखा घर भएका २१ वर्षीय सोम गुरुङ, तनहुँका २१ वर्षीय राजीव गुरुङ, २१ वर्षीय युनिक श्रेष्ठ, सर्लाहीका १७ वर्षीय सुमित तितुङ र रामेछापका १६ वर्षीय दीपक मगर रहेका छन् । उनीहरूलाई भद्रकालीस्थित जिल्ला प्रहरी परिसर काठमाडौंमा राखी अनुसन्धान भइरहेको प्रहरीले जनाएको छ ।

प्रहरीको प्रारम्भिक अनुसन्धान अनुसार उनीहरूले महाराजगन्जमा कार्यरत असई राय र जवान थापामाथि कुटपिट गरी हत्या गरेका थिए ।

यसअघि सो घटनामा संलग्न रहेकामा युवराज क्याप्छाकी, सोनाम तामाङ (बुद्धिलाल थिङ), होमप्रसाद पौडेल र टिकाराम विकलाई काठमाडौं जिल्ला अदालतको आदेशपछि पुर्पक्षका लागि कारागार चलान गरिएको थियो ।

अनुसन्धानअनुसार काभ्रेको रोशी गाउँपालिका घर भई बालुवाटार बस्ने २८ वर्षीय युवराज क्याप्छाकी र मकवानपुरको थाहा नगरपालिका–७ घर भई चन्द्रागिरी बस्ने २१ वर्षीय सोनाम तामाङले जवान उत्तम थापालाई कुटपिट गरी हत्या गरेका थिए ।

त्यसैगरी, सिन्धुपाल्चोकको त्रिपुरासुन्दरी गाउँपालिका–४ घर भई धुम्बाराही बस्ने ६२ वर्षीय होमप्रसाद पौडेल र उदयपुरको चौदण्डीगढी नगरपालिका–१० घर भई बालकुमारी बस्ने २८ वर्षीय टिकाराम विकले असई मिलन रायको हत्या गरेको अनुसन्धानबाट खुलेको प्रहरीले जनाएको छ ।

जिल्ला प्रहरी परिसर काठमाडौंका एसपी पवन भट्टराईका अनुसार हाल पक्राउ परेकाहरूविरुद्धको अनुसन्धान पूरा गरी पूरक प्रतिवेदन अदालतमा पेस गर्ने तयारी भइरहेको छ ।

प्रहरीले सुमित तितुङ र दीपक मगरलाई असार ३१ गतेदेखि हिरासतमा राखेर अनुसन्धान गरिरहेको छ भने अन्य तीन जना कात्तिक ३ गते पक्राउ परेका थिए ।