लाहिरु जनकपुर बोल्ट्समा दोस्रो सिजनका लागि अनुबन्धित

काठमाडौं । अमेरिकन क्रिकेटर लाहिरु मिलान्था आगामी नेपाल प्रिमियर लिग (एनपीएल) को दोस्रो सिजनमा पनि जनकपुर बोल्ट्सबाटै खेल्ने भएका छन् । जनकपुर बोल्ट्सले शुक्रबार मिलान्थासँग पुनः अनुबन्ध गर्दै यो सिजनका लागि टोली सुदृढ पारेको घोषणा गरेको हो ।

श्रीलंकन मूलका मिलान्था एक समय श्रीलंका ‘ए’ र इमर्जिङ टिमका सदस्य समेत रहिसकेका क्रिकेटर हुन् । पछिल्ला वर्षमा उनी अमेरिकामै घरेलु प्रतियोगिताहरू खेल्दै आएका छन् ।

मिलान्था नेपाली क्रिकेटप्रेमीहरूका लागि नयाँ नाम होइन । तीन वर्षअघि नेपाल क्रिकेट संघ (क्यान) ले आयोजना गरेको नेपाल टी–२० लिगमा उनले लुम्बिनी अल स्टारबाट उत्कृष्ट प्रदर्शन गरेका थिए । सो प्रतियोगितामा उनले १२२ को स्ट्राइक रेटसहित ३४९ रन बनाउँदै सर्वाधिक रन बनाउने खेलाडीहरूको सूचीमा तेस्रो स्थान हासिल गरेका थिए । फाइनलमा उनले ४१ रन बनाएर टोलीलाई च्याम्पियन बनाउन सहयोग गरेका थिए ।

जनकपुर बोल्ट्सका निर्देशक अमित राम श्रेष्ठका अनुसार मिलान्थासँगको अनुबन्ध टोलीको लागि एक रणनीतिक निर्णय हो । श्रेष्ठले भने, “लाहिरु मिलान्थासँग नेपालमा खेल्ने अनुभव छ, जसले उनलाई यहाँको वातावरण र प्रशंसकहरूको अपेक्षाबारे राम्रो बुझाइ दिएको छ । हामी विश्वस्त छौं, उनले त्यो अनुभव र कौशललाई एकीकृत गर्दै एनपीएलमा उत्कृष्ट प्रदर्शन गर्नेछन् ।”

यस सिजनमा जनकपुर बोल्ट्सको मार्की खेलाडी आसिफ शेख रहेका छन् । टोलीका मुख्य प्रशिक्षक पूर्व नेपाली कोच पुबुदु दासानायके हुन् भने सहायक प्रशिक्षकको भूमिकामा मनोज कटुवाल रहेका छन् ।

जनकपुर बोल्ट्सले आगामी एनपीएल सिजनमा उपाधि लक्ष्य राखेको र टोलीले केही अन्य विदेशी खेलाडी अनुबन्ध गर्ने तयारी समेत गरेको जनाएको छ ।