जेनजी आन्दोलनमा प्रहरी हत्या आरोपमा युवक पक्राउ

काठमाडौं । जेनजी आन्दोलनका क्रममा प्रहरीको हत्या गरेको आरोपमा एक युवक पक्राउ परेका छन् ।

प्रहरी स्रोतका अनुसार पक्राउ पर्नेमा काभ्रे घर भएका युवराज क्याप्छाकी रहेका छन् । उनी महाराजगञ्ज वृत्तका प्रहरीलाई कुटपिट गर्दै गरेको भिडियो सार्वजनिक भएपछि प्रहरीले सोही आधारमा उनलाई पक्राउ गरेको हो ।

क्याप्छाकीविरुद्ध कर्तव्य ज्यान सम्बन्धी कसुरमा अनुसन्धान अघि बढाइने भएको जिल्ला प्रहरी परिसर काठमाडौंले जनाएको छ ।

२४ भदौमा भएको आन्दोलनको क्रममा महाराजगञ्ज वृत्तका असई मिलन राय (सिन्धुली) र प्रहरी जवान उत्तम थापा (दार्चुला) को हत्या गरिएको थियो ।
जवान थापालाई आन्दोलनकारीहरूले डीएसपी भन्दै आक्रमण गरी हत्या गरेको विवरण प्रहरीले सार्वजनिक गरेको छ ।

त्यस्तै, सोही दिन प्रहरी प्रभाग कोटेश्वरमा कास्की घर भएका सहायक हवल्दार अमृत गुरुङको पनि आन्दोलनकै क्रममा हत्या भएको थियो ।

यसैगरी प्रहरीका हातहतियार लुटपाट गर्ने, पोसाक लुटपाट र आगजनी गर्नेहरूको पनि प्रहरीले खोजी गरिरहेको छ । आन्दोलनमा प्रहरीका एक हजार बढी हतियार लुटपाट भएका छन् ।