विश्वकपअघि इरान अन्यौलमा, अमेरिकी भिसा अझै नपाउँदा टोली चिन्तित

काठमाडौं । सन् २०२६ को फिफा विश्वकप अमेरिका, क्यानडा र मेक्सिकोमा संयुक्त रूपमा आयोजना हुदैछ । विश्वकप नजिकिँदै जाँदा इरानको राष्ट्रिय फुटबल टोली भने अमेरिकी भिसा नपाउँदा अन्योलमा परेको छ ।

मेक्सिकोका लागि इरानी राजदूत अबोलफजल पसान्दिदेहले टोलीले हालसम्म अमेरिका प्रवेशका लागि आवश्यक भिसा प्राप्त नगरेको बताएका छन् । उनले इरानलाई अन्य टोलीसरह सहज वातावरण नदिइएको गुनासोसमेत गरेका छन् ।

राजदूत पसान्दिदेहका अनुसार इरानले सुरुमा अमेरिकाको एरिजोनास्थित टक्सनमा प्रशिक्षण शिविर राख्ने योजना बनाएको थियो । तर भिसा प्रक्रियामा अनिश्चितता बढेपछि टोलीले तयारी मेक्सिकोमै गर्ने निर्णय गरेको छ ।

कतारी सञ्चारमाध्यम अल जजिराका अनुसार उनले, “अमेरिकाले खेलाडीहरूलाई भिसा दिन्छ वा दिँदैन भन्ने अझै स्पष्ट छैन,” बताएका छन् ।

प्रतियोगिताको तालिकाअनुसार इरानले जुन १५ मा लस एन्जलसमा न्युजिल्यान्डसँग, जुन २१ मा बेल्जियमसँग र जुन २६ मा सियाटलमा इजिप्टसँग खेल्ने कार्यक्रम रहेको छ । तर भिसा प्रक्रियाको अन्यैलले टोलीको तयारी र सहभागितामाथि प्रश्न उठाएको छ ।

अमेरिका र इरानबीच पछिल्लो समय बढ्दो राजनीतिक तथा सुरक्षा तनावले पनि परिस्थितिलाई थप जटिल बनाएको छ । इरानले सुरक्षाको कारण देखाउँदै आफ्ना खेलहरू अमेरिकाबाट हटाएर मेक्सिकोमा सार्न फिफासँग आग्रह गरेको थियो । तर फिफाले निर्धारित तालिकाअनुसार नै खेल सञ्चालन हुने स्पष्ट पारेको थियो ।

यसैबीच अमेरिकी राष्ट्रपति डोनाल्ड ट्रम्प निकट दूत पाओलो जाम्पोलीले इरानको स्थानमा इटालीलाई विश्वकपमा सहभागी गराउने प्रस्ताव अघि सारेका थिए । चार पटकको विश्वविजेता इटाली छनोट हुन नसकेपछि यस्तो चर्चा चुलिएको थियो ।

तर फिफाले इरानको सहभागितामा कुनै शंका नरहेको बताउँदै आएको छ । फिफा अध्यक्ष जियानी इन्फान्टिनोले पनि हालै इरानी टोली विश्वकपमा सहभागी हुने विश्वास व्यक्त गरेका थिए ।

इरान र अमेरिकाबीच फुटबल मैदानमा पनि पुरानो प्रतिस्पर्धा रहँदै आएको छ । सन् १९९८ को विश्वकपमा इरानले अमेरिकालाई २–१ ले हराएको थियो भने सन् २०२२ को विश्वकपमा अमेरिकाले १–० को जित निकालेको थियो ।