एमाले ११औँ महाधिवेशनमा खेलकुद क्षेत्रका उम्मेदवारप्रति विशेष चासो

काठमान्डु । नेकपा एमालेको ११औँ राष्ट्रिय महाधिवेशनमा खेलकुद क्षेत्रसँग सरोकार राख्ने नेताहरूको उल्लेखनीय उपस्थिति देखिएको छ । पार्टीको नेतृत्व चयनसँगै खेलकुद क्षेत्रको भावी दिशा कस्तो हुने भन्ने चासो पनि महाधिवेशनमा उठ्न थालेको छ ।

नेपाल क्लाइम्बिङ स्पोर्ट्स एसोसिएसनका पूर्व महासचिव मेघराज पौडेल र हालका अध्यक्ष रमेश पौडेल केन्द्रीय सदस्यका आकाङ्क्षी छन् । लामो समयदेखि एमाले केन्द्रीय सदस्य रहँदै आएका रमेश पौडेल सत्ताको दुरुपयोग नगर्ने, खेल भावना र निष्पक्षतालाई आत्मसात् गर्ने नेताका रूपमा परिचित छन् । राजनीतिक चलखेलभन्दा पनि संस्थागत विकासमा जोड दिनुपर्ने उनको धारणा रहँदै आएको छ । मेघराज पौडेलले पनि नेपालमा साहसिक तथा पर्यटकीय खेलको विकासमा उल्लेखनीय योगदान पुर्‍याएका छन् । हाल उनी एमालेको खेलकुद विभागमा सक्रिय छन् ।

बाग्मती प्रदेशका पूर्वमन्त्री एकलाल श्रेष्ठ पनि महाधिवेशन प्रतिनिधिका रूपमा सहभागी छन् । उनी चेस क्षेत्रमा प्रत्यक्ष योगदानबिनै महासचिव र अध्यक्ष बनेको आरोप लाग्दै आएको छ । चेससम्बन्धी ज्ञान र अनुभव कमजोर भए पनि ओलम्पियाडमा टिम कप्तान बनेका कारण त्यसबेला नेपाली टोली विवादमा परेको थियो । अभद्र व्यवहार र राजनीतिक आडमा पद दुरुपयोग गरेको आरोपका कारण उनी आलोचनामा परेका थिए ।

यस्तै, कोशी प्रदेश खेलकुद परिषद्का सदस्य–सचिव तथा एमालेको भातृ सङ्गठन नेपाल खेलकुद महासङ्घका अध्यक्ष परशुराम बस्नेतको भूमिकाप्रति पनि प्रश्न उठिरहेका छन् । केही वर्षअघि विराटनगरमा भएको साधारण सभाबाट नेतृत्व चयन हुन नसकेपछि बस्नेतलाई ‘टिका लगाएर’ अध्यक्ष बनाइएको आरोप छ । त्यसयता अध्यक्ष बस्नेत र महासचिव धरमबहादुर लामाले आफ्नै सङ्गठनका केही व्यक्तिमाथि पूर्वाग्रही व्यवहार र ज्यादती गरेको गुनासो तल्लो तहका कार्यकर्ताले गर्दै आएका छन् ।

लामो समय नेपाल खेलकुद महासङ्घको अध्यक्ष तथा पूर्व युवा तथा खेलकुद मन्त्री रहेका पुरुषोत्तम पौडेल यसपटक केन्द्रीय कमिटी सचिवका उम्मेदवार बनेका छन् । सरल स्वभावका पौडेल शक्तिको दुरुपयोग, भ्रष्टाचार वा अकुत सम्पत्ति कमाउने नेताको सूचीमा नपर्ने व्यक्तित्वका रूपमा चिनिन्छन् ।

नेपाल स्की सङ्घको नेतृत्व तहमा लामो समय सक्रिय शान्तमाया परियार पनि केन्द्रीय सदस्यकी आकाङ्क्षी हुन् । शालीन, बौद्धिक र सन्तुलित व्यक्तित्वको छवि बनाएकी परियार मनाङ क्षेत्रको राजनीतिमा समेत लोकप्रिय मानिन्छिन् ।

यसैबीच, लामो समय एमाले खेलकुद इन्चार्ज रहेका कर्णबहादुर थापा पनि महाधिवेशनमा चर्चामा छन् । आफ्नो राजनीतिक जीवनको ठूलो समय केपी शर्मा ओलीनिकट रहे पनि हाल उनी ओलीविरोधी धारका अगुवाका रूपमा देखिएका छन् । थापा ईश्वर पोखरेल प्यानलबाट सचिव पदका उम्मेदवार हुने सम्भावना बलियो रहेको बताइन्छ ।

महाधिवेशनले खेलकुद क्षेत्रसँग सम्बन्धित यस्ता पात्रहरूको भविष्य तय गर्ने भएकाले खेलकुदकर्मी र पार्टी कार्यकर्ताको चासो बढ्दो छ ।