मुग्लिन–नारायणगढ सडक फेरि अवरुद्ध, तुनइखोलामा सुख्खा पहिरो

काठमाडौं । चितवनको इच्छाकामना गाउँपालिका–५, तुनइखोला क्षेत्रमा सुख्खा पहिरो खस्दा मुग्लिन–नारायणगढ सडकखण्ड पुनः दुवैतर्फ अवरुद्ध भएको छ ।

सडकमा ठूला ढुंगा र माटो बगेर आएपछि सवारी आवागमन ठप्प भएको हो । राजमार्ग सुरक्षा तथा ट्राफिक व्यवस्थापन कार्यालय, रामनगरका एसपी नरेश सुवेदीले सडक विभागसँग समन्वय गरी दुईवटा जेसिबी प्रयोग गरेर अवरोध हटाउने कार्य जारी रहेको जानकारी दिए ।

पहिरोका कारण काठमाडौंतर्फ जाने गाडी जुगेडी र नारायणगढतर्फ जाने सवारीसाधन मुग्लिन बजारमा रोकिएका छन् । जोखिमपूर्ण भाग पूर्ण रूपमा सुरक्षित भएपछि मात्र सवारी चलाउने तयारी गरिएको सुवेदीले बताए ।

यसअघि आज बिहान ८ बजे पहिरो हटाएर सडक खुलाइएको थियो । तर, फेरि पहिरो खस्दा सडक पुनः बन्द हुन पुगेको हो ।