खिजिदेम्बामा आठौँ राष्ट्रपति रनिङशिल्ड प्रतियोगिता सम्पन्न, फुलमती मावि पुनः प्रथम

काठमान्डु । ओखलढुंगाको खिजिदेम्बा गाउँपालिकामा सम्पन्न ‘आठौँ राष्ट्रपति रनिङशिल्ड अन्तर–माध्यमिक विद्यालयस्तरीय खेलकुद प्रतियोगिता’मा फुलमती माध्यमिक विद्यालय, खिजिफलाटेले पुनः उपाधि हात पारेको छ । लगातार तेस्रो वर्ष प्रथम हुँदै फुलमती माविले यसपटक पनि उत्कृष्ट प्रदर्शन गर्दै समग्र रनिङशिल्ड आफ्नो नाममा कायम राख्न सफल भएको हो ।

प्रतियोगितामा फुलमती माविले १० स्वर्ण, ७ रजत र २ कास्य गरी कुल १९ पदक जित्दै अग्रस्थानमा रह्यो । समान १९ पदक हात पारेको चण्डेश्वरी मावि, रगनी कम स्वर्णका कारण दोस्रो स्थानमा रह्यो । उसले ७ स्वर्ण, ७ रजत र ५ कास्य जितेको थियो । तेस्रो स्थान कुण्डली मावि कातिसञ्जोरले ५ स्वर्ण, ५ रजत र ६ कास्यसहित १६ पदक जितेर तेस्रो स्थान सुरक्षित गर्यो ।

आयोजक हिमगंगा मावि रावादोलु पनि प्रतिस्पर्धामा बलियो उपस्थित भयो । ४ स्वर्ण, ७ रजत र ७ कास्य सहित १८ पदक जिते पनि स्वर्ण कम भएकै कारण हिमगंगा चौथो स्थानमा सीमित भयो ।

त्यस्तै, चण्डेश्वरी मावि माझगाउँले १ स्वर्ण, २ रजत र ३ कास्यसहित पाँचौँ स्थान ओगट्यो । नर्मदेश्वर मावि चप्लेटीले १ स्वर्ण र ५ कास्यसहित ६ पदक जितेर छैटौँ स्थानमा रह्यो भने शिवालय मावि छेर्मादिङ पात्लेले यसपटक कुनै पदक प्राप्त गर्न सकेन ।

समापन समारोहमामा प्रमुख अतिथि तथा खिजिदेम्बा गाउँपालिकाका अध्यक्ष गोम्बु शेर्पाले आगामी वर्ष राष्ट्रपति रनिङशिल्ड जिल्लास्तरीय प्रतियोगिता खिजिदेम्बामै आयोजना गर्ने प्रतिबद्धता जनाए । उनले यस वर्ष सम्पूर्ण खेल विधा उपलब्ध नभएकाले प्रतियोगिता बाहिरै गर्न परे पनि आगामी वर्ष सबै इभेन्ट समावेश गरेर जिल्लामै उत्कृष्ट आयोजनाको तयारी गरिने बताए ।

प्रतियोगितामा हिमगंगा मावि रावादोलुका लिला सुनुवार र फुलमती माविका खेमकुमारी सुनुवार (सुन्दीरा) उत्कृष्ट खेलाडी घोषित भए । उनीहरूको प्रदर्शनले विद्यालयहरूबीचको प्रतिस्पर्धा मात्र उठाइदिएन, गाउँपालिकाभित्रको खेलाडी क्षमताको स्तर पनि प्रस्टै देखाएको छ ।

खिजिदेम्बा गाउँपालिकाको प्रायोजन तथा हिमगंगा मावि रावादोलुको आयोजनामा मंसिर ४ देखि ६ गतेसम्म ५ नं.स्थित बोजेटार खेलमैदानमा प्रतियोगिता सम्पन्न भएको थियो । तीन दिन अवधिभर विभिन्न ट्रयाक तथा फिल्ड इभेन्टमा सहभागी विद्यार्थीहरूको उत्साह, स्थानीय बासिन्दाको उपस्थिति र विद्यालयहरूको प्रतिस्पर्धाले खेलकुद क्षेत्रप्रतिको आकर्षण अझ प्रस्ट बनाएको आयोजकले जनाएको छ ।