टी–२० विश्वकप छनोटः जापानले नेपाललाई १३२ रनको लक्ष्य दियो

काठमाडौं । ओमानको एल एमिरेट क्रिकेट मैदानमा जारी आईसीसी टी–२० विश्वकप एसिया इस्ट प्यासिफिक छनोटको समूह चरणको दोस्रो खेलमा जापानले नेपाललाई १३२ रनको लक्ष्य प्रस्तुत गरेको छ ।

नेपालले टस जितेर फिल्डिङ रोजेपछि जापानले निर्धारित २० ओभरमा ८ विकेटको क्षतिमा १३१ रन जोड्यो । एक समय १२.४ ओभरमा ९७–१ को बलियो स्थितिमा पुगेको जापानले तेह्रौँ ओभरको पाँचौँ बलमा दोस्रो विकेट गुमायो र त्यसपछि नियमित अन्तरालमा विकेट झर्न सुरु भयो ।

नेपालका लागि गुल्सन झा र सन्दीप लामिछानेले समान २–२ विकेट लिए । सोमपाल कामी र नन्दन यादवले एक–एक विकेट हात पारे ।

जापानका कप्तान केन्डेल काडोवाकी फ्लेमिङले उत्कृष्ट प्रदर्शन गर्दै ४६ बलमा ५ चौका र ३ छक्कासहित ६० रनको पारी खेले । इसाम रहमानले ३१ रनको योगदान दिए ।

नेपालले अब केहीबेरमै लक्ष्य पछ्याउँदै जवाफी ब्याटिङ सुरु गर्नेछ ।