तुइन खोलामा फेरि पहिरो, नारायणगढ–मुग्लिन सडक बन्द

काठमाडौं । नारायणगढ–मुग्लिन सडकखण्ड पुनः पहिरोले अवरुद्ध भएको छ । आइतबार बिहान करिब ११ः३० बजे तुइन खोलामा पहिरो खस्दै सडक पूर्णरूपमा बन्द भएको बागमती प्रदेश राजमार्ग सुरक्षा तथा ट्राफिक व्यवस्थापन कार्यालय रामनगरले जनाएको छ ।

गत शुक्रबार रातिदेखि सञ्चालनमा आएको सो सडक केही दिनमै फेरि बन्द भएको हो । पहिरोका कारण यातायात पुनः रोकिँदा यात्रु र सवारी चालकहरूमा समस्या सिर्जना भएको छ ।

रामनगरका एसपी डिल्ली नारायण पाण्डेका अनुसार ठूलो परिमाणमा माटो र ढुंगामाटो सडकमा थुप्रिएको छ । “माटो पन्छाउन कम्तिमा चार घण्टा समय लाग्ने देखिन्छ,” उनले बताए ।

यसअघि भदौ महिनामा मात्रै नारायणगढ–मुग्लिन खण्डमा १५ पटक पहिरो खसेर सडक अवरुद्ध भएको थियो । मंगलबार गएको ठूलो पहिरो हटाउन सातवटा मेसिन प्रयोग गरी शुक्रबार राति मात्र सडक खुलाइएको थियो ।