टप इन्ड सिरिजमा नेपालको प्रदर्शन ओरालो, लगातार तेस्रो हार

काठमाडौं । अष्ट्रेलियामा जारी टप इन्ड टी–२० सिरिज क्रिकेटमा नेपालले निराशाजनक प्रदर्शन जारी राख्दै लगातार तेस्रो हार व्यहोरेको छ । सोमबार मेलबर्न स्टार्ससँग ३१ रनले पराजित भएपछि नेपालको जितविहीन यात्रा अझ लम्बिएको छ ।

१७६ रनको लक्ष्य पछ्याएको नेपालले निर्धारित २० ओभर पूरा खेले पनि सात विकेट गुमाउँदै १४४ रन मात्रै बनाउन सक्यो । नेपाली पारीको सुरुवात राम्रो भए पनि मध्यक्रम धराशायी हुँदा जित टाढिएको हो ।

ओपनर आशिफ शेखले ४८ बलमा ५३ रनको अर्धशतकीय योगदान दिए भने कुशल भुर्तेलले १३ बलमा २५ रन प्रहार गरे । कप्तान रोहित पौडेलले ३१ बलमा ३३ रन बनाए । तर अन्य ब्याटर खास प्रभाव जमाउन असफल भए । भीम सार्की शून्यमा आउट हुँदा दीपेन्द्रसिंह ऐरी १, कुशल मल्ल ११, गुलशन झा २ र आरिफ शेख ८ रनमा सीमित भए ।

मेलबर्नका अस्टिन एनलेजार्क र डग वारेनले दुई–दुई विकेट लिए ।

त्यसअघि टस जितेर पहिला ब्याटिङ रोजेको मेलबर्नले ७ विकेटको क्षतिमा १७५ रन बनाएको थियो । स्टार्सका ब्लेक म्याकडोनाल्डले ४७ बलमा ७४ र थोमस रोजर्सले ४६ बलमा ६५ रन बनाउँदै नेपाललाई बलिङमा दबाबमा पारे ।

नेपालका सन्दीप लामिछानेले तीन विकेट लिए भने सोमपाल कामी र साहब आलमले एक–एक विकेट लिए ।

यसअघि नेपाल पहिलो खेलमा नर्दन टेरिटोरी स्ट्राइकसँग ४२ रनले र दोस्रो खेलमा बंगलादेश ‘ए’सँग ३२ रनले पराजित भएको थियो । लगातार तीन पराजयपछि नेपाली टोलीमाथि प्रदर्शन सुधार गर्न दबाब बढ्दै गएको छ । आगामी खेलमा जित हात पार्दै नेपालले सिरिजमा पुनरागमन गर्ने अपेक्षा गरिएको छ ।