लुम्बिनी लायन्स दोस्रो क्वालिफायरमा, सकियो काठमान्डुको यात्रा

काठमान्डु । नेपाल प्रिमियर लिग (एनपीएल) टी-२० क्रिकेट अन्तर्गत दोस्रो सिजनमा लुम्बिनी लायन्स दोस्रो क्वालिफायरमा प्रवेश गरेको छ । बुधबार त्रिवि अन्तर्राष्ट्रिय क्रिकेट मैदानमा सम्पन्न खेलमा ६ विकेटको जित निकाल्दै लुम्बिनी प्रतियोगिताको अर्को चरणमा स्थान बनाउन सफल भयो ।

एलिमिनेटरमा पराजयसँगै काठमाडौंले यो सिजन चौथो स्थानमा यात्रा टुंग्याएको छ । अर्कोतर्फ, लुम्बिनीले दोस्रो क्वालिफायरमा पुगेर फाइनल खेल्ने सम्भावनालाई जिउँदो राखेको छ । अब लुम्बिनीले पहिलो क्वालिफायरमा सुदूरपश्चिम रोयल्ससँग पराजित विराटनगर किङ्ससँग भिड्नेछ । सुदूरपश्चिम भने पहिलो क्वालिफायर जितेर नै फाइनलमा पुगेको छ । दोस्रो क्वालिफायरको विजेता फाइनलमा सुदूरपश्चिम सामना गर्नेछ भने हार्ने टोली तेस्रो स्थानमा सीमित हुनेछ ।

काठमान्डुको कमजोर सुरुवात निर्णायक
टस जितेर ब्याटिङ रोजेको काठमान्डु सुरूदेखि नै दबाबमा पर्‍यो । ओपनिङ जोडीसहित पहिलो चार ब्याट्सम्यान दोहोरो अंकमा पुग्न असफल रहे । बेन चाल्सवर्थ ५, आकाश त्रिपाठी १, सन्नी पटेल ७ र मिलिन्द कुमार २ रनमै पवेलियन फर्किए । कप्तान करण केसीले ९ रन जोडे ।

टीम ९ ओभर नखेल्दै ६ विकेटमा ५१ रनको संकटमा परेको बेला सन्तोष यादवले सर्वाधिक २३ रन बनाए । मोहम्मद अदिल आलम र जोन सिम्पसनले १८–१८ रन जोडे भने भीम सार्कीले १४ रन बनाए । निर्धारित ओभरमै काठमान्डुले १११ रन मात्र बनायो ।

लुम्बिनीको सहज रन चेज
११२ रनको सामान्य लक्ष्य पछ्याउन आएको लुम्बिनीले १७.४ ओभरमा ६ विकेटको क्षतिमा लक्ष्य पुरा गर्‍यो । ओपनर डीआर्सी सर्टले ३३ रनको महत्वपूर्ण योगदान दिए । कप्तान रोहित पौडेलले १८ रन, सन्दीप जोराले २३ रन जोडे । निरोशन डिकवेलाले १४ रन बनाए भने दीलिप नाथ र रुवेन ट्रम्पेलम्यानले क्रमशः ७ र ५ रन जोडे ।

बलिङमा रोहित र शेरको चमक
लुम्बिनीबाट कप्तान रोहित पौडेल र शेर मल्लले समान ३–३ विकेट लिए । ट्रम्पेलम्यानले दुई ओपनरलाई आउट गर्दै महत्वपूर्ण योगदान दिए भने अभिषेक गौतमले १ विकेट आफ्नो नाममा लेखाए ।

काठमान्डुका बलरमध्ये सन्तोष यादवले २ विकेट लिए भने सन्नी पटेल, करण केसी, सहाब अमाल र रसिद खानले एक–एक विकेट हात पारे ।

यस जितसँगै लुम्बिनी लायन्स उपाधि नजिक पुर्‍याएको छ भने काठमान्डु गुर्खाजको सिजन समाप्त भएको छ ।