पेनाल्टीमा टोटनह्यामलाई हराउँदै पीएसजीले जित्यो सुपर कप

काठमाडौं । टोटनह्यामलाई टाइब्रेकरमा पराजित गर्दै पेरिस सेन्ट–जर्मेन (पीएसजी)ले यूईएफए सुपर कपको उपाधि आफ्नो बनाएको छ ।

गएराति सम्पन्न फाइनलमा निर्धारित ९० मिनेट र इन्ज्युरी समय मिलाएर दुवै टोली २–२ को बराबरीमा रोकिएपछि खेलको नतिजा पेनाल्टी सुटआउटबाट तय भयो । पेनाल्टीमा नुनो मेन्डेजको निर्णायक गोलसँगै पीएसजी ४–३ को जितसँग उपाधि उचाल्न सफल भयो ।

खेलको पहिलो हाफमा गोलका लागि संघर्षरत पीएसजी दोस्रो हाफमा उत्कृष्ट पुनरागमन गर्न सफल भयो । टोटनह्यामले ३९औं मिनेटमा भान डे भेनको गोलमार्फत अग्रता लिएको थियो भने ४८औं मिनेटमा क्रिस्टियन रोमेरोले त्यो अग्रता दोब्बर पारे ।

८४औं मिनेटसम्म २–० ले अघि रहेको टोटनह्याम ८५औं मिनेटमा लि काङ यीको गोलबाट दबाबमा पर्यो । त्यसपछि इन्ज्युरी समयको चौथो मिनेटमा वैकल्पिक खेलाडीको रूपमा ७७औं मिनेटमा मैदान प्रवेश गरेका गोन्कालो रामोसले बराबरी गोल गर्दै खेललाई टाइब्रेकरमा पुर्‍याए ।

पेनाल्टीमा पराजय भोगेसँगै टोटनह्यामले तीन महिनाभित्र लगातार दोस्रो युरोपियन उपाधि जित्ने सुनौलो अवसर गुमायो ।