एमालेद्वारा ‘अपानी–२’ जारी, केन्द्रीय नेताहरूको जिम्मेवारी हेरफेर

काठमाडौं । नेपाल कम्युनिष्ट पार्टी (एमाले) ले पार्टी संगठनलाई थप सक्रिय र व्यवस्थित बनाउने उद्देश्यसहित ‘अन्तर पार्टी निर्देशन–२ (अपानी–२)’ सार्वजनिक गरेको छ । शुक्रबार जारी गरिएको ४६ पृष्ठ लामो दस्तावेजमा समसामयिक राजनीतिक अवस्थाको समीक्षा, संगठन विस्तारका योजना तथा केन्द्रीय नेताहरूको कार्यविभाजन समेटिएको छ ।

दस्तावेजमा पार्टीका २९९ जना केन्द्रीय सदस्यको जिम्मेवारी निर्धारण गरिएको छ । केन्द्रदेखि प्रदेश, जिल्ला हुँदै पालिका तहसम्म संगठनलाई प्रभावकारी बनाउने लक्ष्यका साथ नेताहरूलाई विभिन्न भूगोल र विभागको जिम्मेवारी तोकिएको एमालेले जनाएको छ ।

एमालेले संगठन सुदृढीकरणका लागि ‘मिसन पार्टी जागरण’ अभियान सञ्चालन गर्ने निर्णय पनि अपानीमार्फत सार्वजनिक गरेको छ । पार्टीका नीति, कार्यक्रम र उपलब्धिलाई जनस्तरसम्म पुर्‍याउने तथा कार्यकर्तालाई थप सक्रिय बनाउने उद्देश्यले अभियान अघि बढाइने उल्लेख गरिएको छ ।

दस्तावेजमा पछिल्लो समय देशमा विकसित राजनीतिक घटनाक्रमको विश्लेषण गरिएको छ । साथै अध्यक्ष केपी शर्मा ओलीको पक्राउ र त्यसपछिको रिहाइसँग सम्बन्धित विषयलाई पनि समेटिएको छ । सचिवालय बैठकबाट भएका विभिन्न निर्णयहरूलाई समेत अपानीमा समावेश गरिएको छ ।

आगामी निर्वाचनलाई लक्षित गर्दै संगठनात्मक तयारीलाई तीव्र बनाउने एमालेको रणनीति दस्तावेजमा झल्किएको छ । पार्टी नेतृत्वले निर्वाचन केन्द्रित गतिविधि, जनपरिचालन तथा संगठन विस्तारलाई प्राथमिकतामा राखेर कार्ययोजना तय गरेको जनाएको छ ।

अपानीअनुसार अध्यक्ष केपी शर्मा ओलीले समग्र पार्टी गतिविधिको नेतृत्व गर्नेछन् । उपाध्यक्षहरूलाई विभिन्न विभाग र क्षेत्रको समन्वय तथा अनुगमनको जिम्मेवारी दिइएको छ भने महासचिव शंकर पोखरेललाई संगठनात्मक कामको समन्वय, निर्देशन तथा केन्द्रीय कार्यालय सञ्चालनको प्रमुख जिम्मेवारी तोकिएको छ ।

एमालेले जारी गरेको नयाँ निर्देशनलाई आगामी राजनीतिक रणनीति, संगठन विस्तार र निर्वाचन तयारीको महत्वपूर्ण दस्तावेजका रूपमा हेरिएको छ । पार्टीभित्र जिम्मेवारी बाँडफाँटलाई स्पष्ट बनाउँदै संगठनलाई थप गतिशील बनाउने उद्देश्यले अपानी जारी गरिएको नेताहरूले बताएका छन् ।