लगातार दोस्रो पटक काभा च्याम्पियन बन्यो इरान, नेपाल पदकविहीन

काठमाडौं । त्रिपुरेश्वरस्थित राष्ट्रिय खेलकुद परिषद्को कभर्डहलमा सम्पन्न काभा महिला भलिबल च्याम्पियनसिपको उपाधि इरानले लगातार दोस्रो पटक जितेको छ । शुक्रबार भएको फाइनलमा इरानले काजखस्तानलाई ३–१ सेटले पराजित गर्दै आफ्नो दबदबा कायम राख्यो ।

इरानले पहिलो सेट २५–१८ ले जितेर उत्कृष्ट सुरुआत गरेको थियो । दोस्रो सेटमा काजखस्तानले २५–१९ को जित निकाल्दै खेल बराबरीमा ल्यायो । तर त्यसपछि इरानले पुनः लय समात्दै तेस्रो सेट २५–१५ र चौथो सेट २५–२१ ले आफ्नो पक्षमा पार्दै च्याम्पियन बन्न सफल भयो ।

यसअघि इरानले सन् २०२५ मा उज्वेकिस्तानमा आयोजित दोस्रो संस्करणको उपाधि पनि जितेको थियो । काठमाडौंमा सन् २०२४ मा सुरु भएको प्रतियोगिताको पहिलो संस्करणमा तेस्रो बनेको इरानले त्यसयता लगातार दुई संस्करण अपराजित रहँदै उपाधि उचालेको हो ।

यस संस्करणमा इरानले खेलेका पाँचै खेल जित्यो । प्रतियोगिताभर १५ सेट जितेको इरानले केवल फाइनलमा मात्र एक सेट गुमाएको थियो । काजखस्तानलाई उसले समूह चरणमै पनि सोझो सेटमा हराएको थियो ।

सेमिफाइनलमा इरानले घरेलु टोली नेपाललाई ३–० ले पराजित गरेको थियो भने काजखस्तानले भारतलाई समान सेटमा हराएर फाइनल यात्रा तय गरेको थियो ।

फाइनलमा समूह चरणको हारको बदला लिने लक्ष्यसहित उत्रिएको काजखस्तान इरानको संगठित खेल अगाडि टिक्न सकेन । एफआईभिबी विश्व वरीयतामा समावेश प्रतियोगिता भएकाले उपाधिसँगै इरानले वरीयतामा पनि लाभ पाउने भएको छ ।

इरान र काजखस्तान दुबै टोली आगामी एभिसी कपको तयारीमा रहेकाले काभा च्याम्पियनसिप उनीहरूका लागि महत्वपूर्ण अभ्यास प्रतियोगिता बनेको थियो । जुन ६ देखि १४ सम्म फिलिपिन्सको कान्डोनमा हुने एभिसी कपमा यी दुई टोली समूह ‘बी’ मा छन् । उक्त समूहमा भियतनाम, इन्डोनेसिया, हङकङ र लेवनान पनि रहेका छन् ।

समूह ‘ए’मा आयोजक फिलिपिन्ससँगै चाइनिज ताइपेई, दक्षिण कोरिया, किर्गिस्तान, अस्ट्रेलिया र उज्वेकिस्तान छन् ।

भारतसँग हार्दै नेपाल चौथो
घरेलु समर्थकमाझ उपाधिको लक्ष्य राखेको नेपाल भने यसपटक पदकविहीन रह्यो । तेस्रो स्थानका लागि शुक्रबार भएको खेलमा नेपाल भारतसँग ३–१ सेटले पराजित भयो ।

भारतले नेपाललाई २५–२२, २५–२३, १५–२५ र २५–२२ ले हराउँदै तेस्रो स्थान हासिल गर्‍यो भने नेपाल चौथो स्थानमा सीमित बन्यो ।

प्रतियोगितापछि नेपालका मुख्य प्रशिक्षक जगदिश भट्टले नयाँ खेलाडी समेटिएको नेपाली टोलीका लागि अनुभवी टोलीविरुद्ध खेल्नु ठूलो सिकाइको अवसर भएको प्रतिक्रिया दिए ।