तीन दिनपछि सञ्चालनमा आयो बीपी राजमार्ग, जोखिमपूर्ण यात्रा नगर्न प्रहरीको आग्रह

काठमाडौं । वर्षापछि बाढीले अवरुद्ध बनेको बीपी राजमार्ग तीन दिनपछि पुनः सञ्चालनमा आएको छ । रोशी खोलामा आएको बाढीका कारण अवरुद्ध सडकमा अस्थायी ‘डाइभर्सन’ निर्माण गरिएपछि आज बिहानदेखि सवारीसाधन सञ्चालनमा ल्याइएको हो ।

जिल्ला प्रहरी कार्यालयका अनुसार वर्षा अझै जारी रहेकाले अत्यावश्यक कामबाहेक यो मार्ग प्रयोग नगर्न सर्वसाधारणलाई आग्रह गरिएको छ । पानी पर्नेबित्तिकै रोशी क्षेत्रको अस्थायी डाइभर्सनमा क्षति पुग्ने जोखिम रहेकाले यात्रु तथा चालकलाई सतर्कता अपनाउन भनिएको छ ।

गत सोमबार आएको बाढीले राजमार्गको विभिन्न भागमा क्षति पुर्‍याउँदै सडक सम्पर्क पूर्णरूपमा विच्छेद गरेको थियो । विशेषगरी रोशी खोलाको आसपास निर्माण गरिएका अस्थायी सडक संरचना बगाउँदा सयौँ सवारीसाधन बीच बाटोमै रोकिएका थिए ।

राजमार्ग बन्द भएपछि धुलिखेल, काभ्रेभञ्ज्याङ, मङ्गलटार तथा सिन्धुलीको नेपालथोक क्षेत्रमा सवारीसाधन रोक्नुपरेको थियो । यातायात अवरुद्ध हुँदा यात्रुहरूले लामो समयसम्म सास्ती बेहोर्नुपरेको स्थानीयले बताएका छन् ।

गत वर्षको बाढीपहिरोले बीपी राजमार्गअन्तर्गत चौकीडाँडा, रोशी र नेपालथोक क्षेत्रमा करिब १८ किलोमिटर सडक बगाएको थियो । त्यसपछि खोलामै अस्थायी डाइभर्सन बनाएर यातायात सञ्चालन गरिँदै आएको छ । अहिले प्रभावित क्षेत्रमा स्थायी सडक पुनर्निर्माणको काम जारी रहेको सम्बन्धित निकायले जनाएको छ ।