अमेरिकासँग वार्ता नभएको इरानको दाबी, ट्रम्पको भनाइ अस्वीकार

काठमाडौं । इरानले अमेरिकासँग कुनै पनि प्रकारको वार्ता नभएको स्पष्ट पारेको छ। इरानी समाचार संस्था तस्निम न्यूज एजेन्सीलेले प्रकाशित गरेको विवरणअनुसार अमेरिका र इरानबीच प्रत्यक्ष वा अप्रत्यक्ष कुनै संवाद नै नभएको दाबी गरिएको हो ।

यसअघि अमेरिकी राष्ट्रपति डोनाल्ड ट्रम्पले भने इरानसँग पछिल्ला दुई दिनदेखि सकारात्मक र सिर्जनात्मक वार्ता भइरहेको बताएका थिए । आफ्नै सामाजिक सञ्जाल ट्रुथ सोसियलमार्फत उनले यस्तो ‘गहिरो र विस्तृत’ वार्ता आगामी सातासम्म जारी रहने उल्लेख गरेका थिए ।

ट्रम्पले वार्ता जारी रहेकै कारण इरानका ऊर्जा पूर्वाधारलाई लक्षित गरेर गरिने भनिएको सैन्य कारबाही पाँच दिनका लागि स्थगित गरिएको घोषणा समेत गरेका थिए । तर इरानी पक्षले उक्त दाबीलाई पूर्ण रूपमा अस्वीकार गरेको छ ।

तस्निमले नाम नखुलाइएको एक वरिष्ठ सुरक्षा अधिकारीलाई उद्धृत गर्दै जनाएअनुसार इरानको ‘विश्वसनीय सैन्य चेतावनी’का कारण अमेरिका पछि हट्न बाध्य भएको हो । साथै वित्तीय बजारमा देखिएको जोखिम र अमेरिका तथा पश्चिमा देशहरूको ऋणपत्रमा पर्ने सम्भावित असरले पनि यस्तो निर्णयमा प्रभाव पारेको उल्लेख गरिएको छ ।

युद्ध सुरु भएयता विभिन्न मध्यस्थकर्तामार्फत् इरानसम्म सन्देश आइरहे पनि इरानले आफ्नो सुरक्षा रक्षाका लागि अडान कायमै राखेको बताइएको छ । स्रोतका अनुसार होर्मुज जलडमरु क्षेत्रलाई पुनः सामान्य अवस्थामा फर्कन नदिने र ऊर्जा बजारलाई स्थिर हुन नदिने रणनीतिमा इरान दृढ रहेको छ ।