मधेस प्रदेशका मुख्यमन्त्री यादवले पाए विश्वासको मत

काठमान्डु । मधेस प्रदेशका मुख्यमन्त्री कृष्णप्रसाद यादवले प्रदेश सभाबाट विश्वासको मत प्राप्त गरेका छन् । शुक्रबार बसेको प्रदेश सभा बैठकमा उनले पेश गरेको विश्वासको मतको प्रस्ताव बहुमतले पारित भएको हो ।

विश्वासको मतको पक्षमा ९२ जना सांसदले मतदान गरेका थिए भने विपक्षमा कुनै पनि मत परेन । १०७ सदस्यीय मधेस प्रदेश सभामा विश्वासको मतका लागि न्यूनतम ५४ सांसदको समर्थन आवश्यक पर्ने व्यवस्था छ ।

प्रदेश सभाको बैठकको अध्यक्षता गरिरहेकी उपसभामुख बबिता कुमारी राउत ईशरले शुक्रबार साँझ विश्वासको मतको प्रस्ताव पारित भएको औपचारिक घोषणा गरिन् । उनले संविधानको धारा १६८ को उपधारा ४ तथा प्रदेश सभा कार्य सञ्चालन नियमावली २०७५ अनुसार मुख्यमन्त्री यादवले बहुमतसहित विश्वासको मत प्राप्त गरेको स्पष्ट पारिन् ।

नेपाली कांग्रेस संसदीय दलका नेता यादव सात दलीय गठबन्धनका ७७ सांसदको समर्थनमा गत मंसिर १९ गते मुख्यमन्त्री नियुक्त भएका थिए । शुक्रबारको मतदानमा सत्तारूढ गठबन्धनसँगै नेकपा (एमाले)ले समेत उनलाई विश्वासको मत दिएको हो ।