एमाले महाधिवेशनः प्रतिनिधि अद्यावधिक अन्तिम चरणमा, २५ गतेभित्र परिचयपत्र छपाइ सकिने

काठमान्डु । नेकपा (एमाले)को ११औँ राष्ट्रिय महाधिवेशनका लागि प्रतिनिधि अद्यावधिक गर्ने प्रक्रिया अन्तिम चरणमा पुगेको छ । पार्टी केन्द्रीय कार्यालयमा संगठन विभागका प्रमुख काशीनाथ अधिकारी र सचिव माधव ढुंगेलसहितको टोली निरन्तर रूपमा प्रतिनिधि विवरण अद्यावधिकमा जुटिरहेको विभागले जनाएको छ ।

संगठन विभागका प्रमुख अधिकारीका अनुसार महाधिवेशनका लागि २ हजार १ सय ५४ जना प्रतिनिधि विभिन्न तहबाट निर्वाचित भइसकेका छन् । साथै १ सय ८ जना प्रतिनिधि केन्द्रबाट मनोनयन गरिने भएकाले कुल प्रतिनिधि संख्या २ हजार २ सय ६२ पुग्नेछ ।

‘घरफर्क अभियान’मार्फत आएका तीन व्यक्तिले पनि प्रतिनिधि बन्न निवेदन दिएको र उनीहरूको विषयमा अन्तिम निर्णय पार्टी सचिवालयले गर्ने विभागले जनाएको छ ।

धनकुटा र ओखलढुंगामा देखिएको प्रतिनिधि छनौटसम्बन्धी विवाद समाधान भइसकेको अधिकारीले जानकारी दिए । दुवै जिल्ला पार्टीको अन्तरपार्टी निर्देशन–१३ अनुसार मापदण्ड नपुगेको भन्दै केन्द्रले पुनः छनौट गर्न निर्देशन दिएको थियो । पुनः प्रक्रियाबाट दुवै जिल्लामा सर्वसम्मत रूपमा प्रतिनिधि चयन भएका छन् ।

यसबाहेक तीन जिल्लामा परेको उजुरी निराकरणको कार्य जारी छ । निर्वाचित रहे तापनि मापदण्ड नपुगेको भन्ने गुनासोका आधारमा पनि छानबिन भइरहेको संगठन विभागले स्पष्ट पारेको छ । मापदण्ड नपुगेका प्रतिनिधिहरूका कार्ड नबनाउने तयारी भइरहेको अधिकारीले बताए ।

“हामीले ७० प्रतिशतभन्दा बढी प्रतिनिधिहरूको भेरिफिकेसन गरिसकेका छौँ,” उनले भने ।

महाधिवेशनका बन्द सत्र हलमा अतिरिक्त ३ सय ५१ जना सल्लाहकार परिषद्का सदस्य सहभागी हुन पाउनेछन् । परिषद्को कुल संख्या ३ सय ७६ भए पनि २५ जना प्रतिनिधि निर्वाचित भएकाले बाँकी सदस्यलाई सहभागी सूचीमा राखिएको हो । यसरी प्रतिनिधि र सहभागी गरी महाधिवेशनमा कुल २ हजार ६ सय १३ जना सहभागी हुनेछन् ।

प्रतिनिधिका परिचयपत्र छपाइको काम पनि तीव्र गतिमा भइरहेको केन्द्रीय कार्यालयले जानकारी दिएको छ । हालसम्म ७० प्रतिशत कार्ड छपाइ भइसकेको र आगामी २५ गतेभित्र सबै कार्ड छपाइ तथा अद्यावधिक प्रक्रिया पूरा हुने कार्यालयले जनाएको छ ।