मधेश प्रदेशको मुख्यमन्त्री बने कांग्रेस नेता कृष्णप्रसाद यादव

काठमान्डु । मधेश प्रदेशमा नेपाली कांग्रेसका कृष्णप्रसाद यादव नवनियुक्त मुख्यमन्त्री बनेका छन् । प्रदेश प्रमुख डा. सुरेन्द्र लाभ कर्णले शुक्रबार यादवलाई औपचारिक रूपमा पदमा नियुक्त गरेका हुन् ।

यसअघि सात दलको गठबन्धनले ७७ प्रदेशसभा सदस्यहरूको समर्थनसहित यादवलाई मुख्यमन्त्री बनाउन दाबी पेश गरेको थियो । यादवलाई जसपा नेपाल, जनमत पार्टी, माओवादी केन्द्र, लोकतान्त्रिक समाजवादी पार्टी र नेकपा एकीकृत समाजवादीले समर्थन गरेका छन् ।

पदबहालीपछि यादवले आफू प्रदेशको पाँचौँ मुख्यमन्त्री भएको उल्लेख गर्दै, अगाडि बढ्दा राम्रो कामको निरन्तरता र कमजोरी सुधार्ने प्रतिबद्धता व्यक्त गरे । हालसम्मका राजनीतिक गतिविधिले जनतामा उत्पन्न निराशा हटाउनेतर्फ नयाँ सरकारले ध्यान दिने उनले बताए ।

पूर्वमुख्यमन्त्री सरोजकुमार यादवले राजीनामा दिएपछि सर्वोच्च अदालतको परमादेशअनुसार संविधानको धारा १६८(२) बमोजिम नयाँ सरकार गठन प्रक्रिया अघि बढाइएको थियो ।

अब मुख्यमन्त्री यादवले ३० दिनभित्र प्रदेशसभाबाट विश्वासको मत प्राप्त गर्नुपर्नेछ ।