भीम रावल नेकपामा समाहित हुँदै, बुधबार राष्ट्रिय सभा गृहमा घोषणा

काठमाडौं । मातृभूमि जागरण अभियान, नेपालका संयोजक भीम रावल आगामी बुधबार नेपाली कम्युनिस्ट पार्टी (नेकपा) मा औपचारिक रूपमा समाहित हुने भएका छन् ।

रावलको पार्टी प्रवेशका लागि काठमाडौंको राष्ट्रिय सभा गृहमा ‘‘वृहत् पार्टी समायोजन कार्यक्रम’ आयोजना गरिएको छ । सो कार्यक्रममा नेकपाका संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाललगायत शीर्ष नेताहरूले सम्बोधन गर्ने कार्यक्रम तय भएको छ ।

एमालेबाट निष्कासनमा परेपछि रावलले मातृभूमि जागरण अभियान सञ्चालन गरेका थिए । पछिल्ला दिनमा एमालेले पुराना नेताहरूमध्ये फर्कन इच्छुकलाई आह्वान गरे पनि रावलले एमालेमा फर्किने निर्णय नलिएर नयाँ बाटो रोजेका हुन् ।

आइतबार नेकपाका नेताहरूसँग भएको छलफल सकारात्मक भएपछि रावलको समायोजन प्रक्रिया तय भएको स्रोतले जनाएको छ । उनका अनुसार, बुधबारको कार्यक्रममा रावल औपचारिक रूपमा नेकपामा प्रवेश गर्नेछन् ।