सर्वदलीय बैठकः सबै दल निर्वाचनमा सहभागी हुन तयार

काठमाडौं । मंगलबार प्रधानमन्त्री सुशीला कार्कीको आह्वानमा प्रधानमन्त्री निवास बालुवाटारमा बसेको सर्वदलीय बैठकमा सहभागी सबै दलहरू आगामी प्रतिनिधि सभा निर्वाचनमा सहभागी हुने स्पष्ट संकेत दिएका छन् । सरकारले फागुन २१ गतेका लागि निर्वाचनको मिति घोषणा गरिसकेको छ ।

बैठकपछि सञ्चारकर्मीहरूसँग कुरा गर्दै सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले सबै दल निर्वाचनमा भाग लिन तयार भएको जनाएका छन् । यद्यपि, दलहरूले निर्वाचनको सुरक्षा व्यवस्थाप्रति चासो व्यक्त गरेको उनले बताए ।

छलफलको क्रममा जेनजी आन्दोलनका क्रममा भएको तोडफोड तथा आगजनीका घटनाबारे गम्भीर चिन्ता व्यक्त गरिएको थियो । सहभागी दलहरूले ती घटनाहरूको छानबिन गरी दोषीहरूलाई कारबाही गर्न माग गरेका छन् ।

बैठकमा सुशासन, भ्रष्टाचार नियन्त्रण तथा निर्वाचन सफल बनाउनुपर्ने आवश्यकताका विषयमा पनि छलफल भयो । मन्त्री खरेलका अनुसार सरकारले निर्वाचनको समुचित वातावरण निर्माण गर्नुपर्ने जिम्मेवारीबारे दलहरूसँग छलफल गर्‍यो ।

सर्वदलीय बैठकमा सहभागी दलहरूले निर्वाचनको निष्पक्षता र शान्तिपूर्ण सञ्चालनका लागि प्रभावकारी सुरक्षा प्रबन्ध गर्न सरकारलाई आग्रह गरेका छन् । खरेलले भने, “राजनीतिक दलहरूको तर्फबाट सुरक्षाको वातावरण अलि बढी मिलाउनुपर्ने कुराहरू आएको छ । सबै दलहरूले चुनावमा भाग लिने कुरा गर्नुभएको छ ।”

सरकार र राजनीतिक दलहरूबीच सहकार्य तथा समन्वयमा आगामी निर्वाचन सम्पन्न गर्ने तयारी देखिएको छ । यद्यपि, दलहरूले सुरक्षित वातावरण सुनिश्चित गर्न सरकारले अझ बढी प्रयास गर्नुपर्ने सन्देश दिएका छन् ।