कक्षा १२ को नतिजा आज सार्वजनिक हुने सम्भावना

काठमाडौं । राष्ट्रिय परीक्षा बोर्ड (एनईबी) कक्षा १२ को नतिजा सार्वजनिक गर्ने अन्तिम तयारीमा जुटेको छ ।

बोर्डका अनुसार प्राविधिक अवरोध नआएमा सोमबार साँझ ७ बजेसम्म नतिजा प्रकाशित गरिने सम्भावना छ ।

कक्षा १२ को वार्षिक परीक्षा गत वैशाख २१ गतेबाट सुरु भई जेठ २ गतेसम्म सञ्चालन भएको थियो । परीक्षा बोर्डको तथ्याङ्कअनुसार कुल ५ लाख ११ हजार ५२५ विद्यार्थी सहभागी भएका थिए ।

तिनीहरूमध्ये ३ लाख ९५ हजार ९०८ विद्यार्थी नियमित समूहबाट र १ लाख १५ हजार ६१७ विद्यार्थी आंशिक समूहबाट परीक्षामा बसेका थिए ।

यस वर्ष शिक्षक महासंघको आन्दोलनका कारण परीक्षा कार्यक्रम १० दिन पछि सरेको थियो । प्रारम्भिक तालिका अनुसार परीक्षा वैशाख ११ गतेदेखि सुरु हुने तय थियो ।

कक्षा १२ लाई विद्यालय तहको अन्तिम र निर्णायक परीक्षा मानिन्छ, जसको नतिजाले विद्यार्थीको भविष्यको शैक्षिक दिशा निर्धारण गर्छ ।