लुम्बिनी लायन्स प्लेअफमा, जनकपुर बोल्ट्स लिगबाटै बाहिर

काठमान्डु । लुम्बिनी लायन्स नेपाल प्रिमियर लिग (एनपीएल) टी२० क्रिकेटको प्लेअफमा प्रवेश गरेको छ । शुक्रबार जनकपुर बोल्ट्सलाई पराजित गरेपछि लुम्बिनी पहिलो पटक एनपीएल एनपीएलको प्लेअफमा प्रवेश गर्न सफल भएको हो । हारसँगै गत सिजनको विजेता जनकपुर बोल्ट्स भने लिग चरणमै बाहिरिएको छ ।

शुक्रबार सम्पन्न लिग चरणको २५औँ खेलपछि शीर्ष चार टोलीको सूची तय भएको छ । सुदूरपश्चिम रोयल्स, काठमान्डु गुर्खाज, विराटनगर किङ्ग्स र लुम्बिनी लायन्स प्लेअफमा स्थान बनाउन सफल रहेका छन् ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा जनकपुरले दिएको १३३ रनको लक्ष्य लुम्बिनीले १९.१ ओभरमा ६ विकेटको क्षतिमा पूरा गर्‍यो । कप्तान रोहित पौडेलले ३४ रनसहित उत्कृष्ट प्रदर्शन गरे भने डार्शी शर्टले ३० र जेजे स्मिटले २१ रन जोडे ।

जनकपुरका बलर सङ्गीथ कुरेले तीन विकेट लिए । मयन यादव र सञ्जय कृष्णमुर्तीले क्रमशः दुई र एक विकेट हात पारे ।

यसअघि टस जितेर पहिले ब्याटिङ गरेको जनकपुरले २० ओभरमा ६ विकेट गुमाउँदै १३२ रन जोडेको थियो । कुरेले नटआउट ४५ रनको योगदान दिए भने मयन यादवले २७ र आशिफ शेखले २० रन बनाए ।

लुम्बिनीका लागि रोहित पौडेल र शेर मल्लले समान दुई–दुई विकेट लिए । रुबेन ट्रम्पलम्यान र जेजे स्मिटले एक–एक विकेट बटुले ।

दोस्रो संस्करणको एनपीएलका सबै खेल त्रिवि मैदानमै दिउँसो र राति गरी सञ्चालन भइरहेका छन् ।