जलेका उत्तरपुस्तिकाका कारण सीटीईभीटीको पुनः परीक्षा मंसिरदेखि

काठमाडौं । जेनजी आन्दोलनका क्रममा जलेर नष्ट भएका उत्तरपुस्तिकाका कारण प्राविधिक शिक्षा तथा व्यावसायिक तालिम परिषद् (सीटीईभीटी) ले पुनः परीक्षा सञ्चालन गर्ने भएको छ ।

परिषद्का प्रवक्ता टैलेन्द्र आचार्यका अनुसार पुनः परीक्षा आगामी मंसिर ४ गतेदेखि सुरु हुनेछ । आन्दोलनका बेला प्रहरी कार्यालयमा सुरक्षाका लागि राखिएका करिब १४ हजार ७ सय उत्तरपुस्तिका जलेर नष्ट भएका थिए ।

प्रवक्ता आचार्यका अनुसार ती उत्तरपुस्तिकाहरू डिप्लोमा, प्रमाणपत्र र प्रि–डिप्लोमा तहका विद्यार्थीका थिए । परीक्षार्थीको मूल्याङ्कन प्रभावित भएपछि सीटीईभीटीले पुनः परीक्षा लिनुपर्ने निर्णय गरेको हो ।