रास्वपा उम्मेदवार थापाले डिभोर्सको प्रमाण सार्वजनिक गरे

रास्वपा उम्मेदवार थापाले डिभोर्सको प्रमाण सार्वजनिक गरे

काठमाडौं । राष्ट्रिय स्वतन्त्र पार्टी (रास्वपा)का उम्मेदवार डा. लेखजङ्ग थापाले रुपन्देही–३ को प्रतिनिधि सभा उपनिर्वाचनअघि आफ्नो डिभोर्स प्रमाण सार्वजनिक गरेका छन् ।

थापाले प्रमाण पार्टीभित्र नभई सामाजिक सञ्जालमार्फत नै सार्वजनिक गरेका हुन् । उनले जिल्ला अदालत रुपन्देहीमा भएको डिभोर्सको कागज सार्वजनिक गर्दै भनेका छन्, “म नेता बन्न होइन, देश बदल्ने अभियानको सहयात्री बन्न आएको हुँ । त्यो रूपान्तरणमा म बल हुन चाहन्छु, कमजोरी होइन । यो देशमा ठूलो राजनीतिक सुनामी आउँदैछ भन्ने रुपन्देहीले सुनाउँदै छ ।”

त्यसक्रममा उनले प्रिइलेक्शनमा प्रतिस्पर्धामा रहेका अन्य आठ जनालाई समेत सम्बोधन गरे । “कसले भन्यो रुपन्देही–३ को उम्मेदवार म मात्रै हुँ भनेर ? रुपन्देही–३ का उम्मेदवार त पुनम, जेबी, रचना, सुलभ, ज्ञानु, मधु, पार्थिवेन्द्र, कुसुम र यो देशलाई माया गर्ने प्रत्येक नेपाली हुन्,” उनले भने ।

थापाले हालै नक्खु कारागारमा भएको सभापतिको भेटलाई स्मरण गर्दै आफूले सुनेका सन्देशलाई पनि जोड दिएका थिए ।

अन्तमा उनले भनेका छन्, “नेपालकै राजनीतिक इतिहासमा अभूतपूर्व अभ्यास मानिएको ‘उम्मेदवार छनोट विधि’ अन्तर्गत ३५ दिन लामो बहुआयामिक प्रक्रियाबाट छनोट भई उम्मेदवार घोषित भएको तथ्य अवगत नै छ‌ । तथापि मेरो पार्टीले गर्ने कुनैपनि निर्णयलाई म सहर्ष स्वागत ,स्वीकार र पालना गर्नेछु ।”