सर्लाहीमा माटो खन्ने क्रममा ढिस्कोले पुरिँदा चार जनाको ज्यान गयो

काठमाडौं । सर्लाहीको हरिपूर्वा नगरपालिका–१, हर्दी खोलाको किनारमा माटो खन्ने क्रममा ढिस्को खस्दा चार जनाको मृत्यु भएको छ ।

बुधबार बिहान करिब सवा ९ बजेको समयमा घर लिप्ने माटो निकाल्ने क्रममा अचानक ढिस्को खस्दा उनीहरू पुरिएका थिए । सर्लाही जिल्ला प्रहरी कार्यालयका प्रमुख प्रहरी वरिष्ठ उपरीक्षक (एसपी) योगेन्द्रकुमार खड्काका अनुसार मृतकहरू माटो लिन गएका बेला माथिबाट माटोको भाग खसेर उनीहरूलाई पुरेको हो ।

ढिस्कोको कारण महोत्तरी जिल्ला, सोनमा गाउँपालिका–६ मगरथानाकी ६५ वर्षीया सायदा खातुन, ९ वर्षीया नर्गिस खातुन, ८ वर्षीय डिल्लु मंसुर र ६ वर्षीया सविवा खातुनको घटनास्थलमै मृत्यु भएको पुष्टि गरिएको छ ।