देशभर सामान्य बदली, केही स्थानमा भारी वर्षाको सम्भावना

काठमाडौं । हाल मनसुनको न्यून चापीय रेखा सरदर स्थानमा अवस्थित रहेको र अरब सागर तथा बङ्गालको खाडीबाट जलवाष्पयुक्त हावा भित्रिएको मौसम पूर्वानुमान महाशाखाले जनाएको छ । यसको प्रभावले देशभर सामान्यतया बदलीको अवस्था देखिएको छ ।

बागमती, गण्डकी, कर्णाली प्रदेशका थोरै स्थानहरूमा तथा अन्य प्रदेशका एक–दुई स्थानमा हाल हल्कादेखि मध्यम वर्षा भइरहेको छ । दिउँसो देशभर सामान्य बदली रहने अनुमान गरिएको छ । बागमती, लुम्बिनी प्रदेश र देशको पहाडी भूभागका केही स्थानहरूमा मध्यम वर्षाको सम्भावना छ ।

कोशी, बागमती र कर्णाली प्रदेशका पहाडी भूभाग तथा लुम्बिनी प्रदेशका तराई क्षेत्रमा एक–दुई स्थानमा भारी वर्षा हुने सम्भावना रहेको छ । महाशाखाले यी क्षेत्रका बासिन्दालाई आवश्यक सतर्कता अपनाउन आग्रह गरेको छ ।

आज राति कोशी, मधेस, बागमती र गण्डकी प्रदेशसहित पहाडी भूभागहरूमा सामान्य बदली रहनेछ भने अन्य क्षेत्रहरूमा आंशिक बदलीको सम्भावना छ । मधेस, कोशी, बागमती र गण्डकी प्रदेशका केही स्थानहरूमा मध्यम वर्षा हुनसक्ने देखिएको छ ।

भारी वर्षाको सम्भावना रहेको कोशी, बागमती, लुम्बिनी र कर्णाली प्रदेशका बासिन्दालाई महाशाखाले बाढी, पहिरो तथा अन्य प्राकृतिक जोखिमप्रति सतर्क रहन आग्रह गरेको छ ।