प्रदेश सरकार गठनमा एमाले–नेकपा सहकार्य, सातै प्रदेशको नेतृत्व बाँडफाँटमा सहमति

काठमाडौं । नेकपा (एमाले) र नेपाल कम्युनिस्ट पार्टी (नेकपा) बीच प्रदेश सरकार गठनका विषयमा तीन बुँदे राजनीतिक सहमति भएको छ । शनिबार भएको सहमतिपत्रमा एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ले हस्ताक्षर गरेका हुन् ।

सहमतिअनुसार दुवै दलले प्रदेश सभामा सहकार्य गर्दै संयुक्त सरकार गठन गर्ने भएका छन् । प्रदेश सरकारको नेतृत्व बाँडफाँटसमेत टुंग्याइएको छ, जसअनुसार कोसी, बागमती र लुम्बिनी प्रदेशमा मुख्यमन्त्री एमालेले पाउनेछ भने कर्णाली र सुदूरपश्चिम प्रदेशको नेतृत्व नेकपाले गर्नेछ ।

मधेश र गण्डकी प्रदेशका हकमा भने प्रदेश सभामा प्रतिनिधित्व गर्ने अन्य राजनीतिक दलहरूसँग छलफल तथा परामर्श गरेर सरकारको नेतृत्व र सहभागिताको स्वरूप निर्धारण गर्ने सहमति भएको छ ।

सहमति हस्ताक्षर कार्यक्रममा एमालेका उपाध्यक्ष विष्णु पौडेल र नेकपाका नेता वर्षमान पुन पनि उपस्थित थिए ।

दुवै दलले प्रदेश सरकार सञ्चालनका क्रममा देखिएका बजेट निर्माणसम्बन्धी विवाद, बजेटविहीनताको अवस्था तथा अस्वस्थ राजनीतिक प्रतिस्पर्धाका कारण उत्पन्न समस्या समाधान गर्न सहकार्य आवश्यक रहेको निष्कर्ष निकालेका छन् ।

साझा वक्तव्यमा प्रदेशमा राजनीतिक स्थिरता कायम गर्दै सुशासन, समृद्धि र प्रादेशिक विकासलाई तीव्रता दिन संयुक्त रूपमा अघि बढ्ने प्रतिबद्धता व्यक्त गरिएको छ ।