रूपन्देही–३ मा हुने भनिएको उपनिर्वाचन रद्द, निर्वाचन आयोगको स्पष्टीकरण

काठमाडौं । निर्वाचन आयोगले कात्तिक १७ गतेका लागि तय गरिएको प्रतिनिधि सभा सदस्य उपनिर्वाचन (रूपन्देही–३) रद्द गरिएको जनाएको छ । आयोगका प्रवक्ता तथा सहसचिव नारायणप्रसाद भट्टराईले राष्ट्रपति रामचन्द्र पौडेलद्वारा प्रतिनिधि सभा विघटन गरी नयाँ निर्वाचन मिति फागुन २१ गते तोकिएकाले उपनिर्वाचन रोकिएको स्पष्ट पारेका छन् ।

आयोगद्वारा जारी विज्ञप्तिमा भनिएको छ, “प्रतिनिधि सभा सदस्य निर्वाचन ऐन, २०७४ को दफा ६८ बमोजिम मिति २०८२/०७/१७ गते रूपन्देही–३ मा उपनिर्वाचन हुने तय भएको थियो । तर राष्ट्रपति कार्यालयबाट २०८२/०५/२७ मा प्रकाशित सूचनामा प्रतिनिधि सभा विघटन भइसकेको र त्यसको आधारमा मिति २०८२/११/२१ मा नयाँ निर्वाचन हुने जनाइएकोले उपनिर्वाचनका सम्पूर्ण बाँकी कार्यक्रमहरू रद्द गरिएको छ ।”