पेट्रोलियम पदार्थमा प्रतिलिटर १५ रुपैयाँ वृद्धि, नयाँ मूल्य मध्यरातदेखि लागू

काठमाडौं । नेपाल आयल निगमले पेट्रोल, डिजेल र मट्टितेलको मूल्यमा प्रतिलिटर १५ रुपैयाँले वृद्धि गरेको छ । निगमका अनुसार यो नयाँ मूल्य चैत २० गते मध्यरातदेखि लागू भइसकेको छ ।

मूल्यवृद्धिसँगै उपभोक्ताले अब पेट्रोलियम पदार्थ खरिद गर्दा थप खर्च व्यहोर्नुपर्ने भएको छ । विशेषगरी तेस्रो वर्गअन्तर्गत पर्ने काठमाडौं, पोखरा र दिपायलमा पेट्रोलको मूल्य प्रतिलिटर २०२ रुपैयाँ पुगेको छ, जुन यसअघि १८७ रुपैयाँ थियो । त्यस्तै, डिजेल र मट्टितेलको मूल्य पनि १६७ रुपैयाँबाट बढेर १८२ रुपैयाँ प्रतिलिटर पुगेको छ ।

यसैगरी दोस्रो वर्गअन्तर्गत पर्ने सुर्खेत र दाङमा पेट्रोलको मूल्य १८६ रुपैयाँबाट बढेर २०१ रुपैयाँ पुगेको छ । डिजेल र मट्टितेलको मूल्य पनि १६६ रुपैयाँबाट बढेर १८१ रुपैयाँ प्रतिलिटर कायम गरिएको छ ।

पहिलो वर्गका सहरहरू चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पनि मूल्य वृद्धि लागू गरिएको छ । यहाँ पेट्रोलको मूल्य १८४ रुपैयाँबाट बढेर १९९ रुपैयाँ ५० पैसा पुगेको छ भने डिजेल र मट्टितेल १६४ रुपैयाँ ५० पैसाबाट बढेर १७९ रुपैयाँ ५० पैसा पुगेको छ ।

निगमका अनुसार मूल्य समायोजनपछि पनि घाटा घटेको छैन । पछिल्लो गणनाअनुसार निगमले १५ दिनको अवधिमा करिब ११ अर्ब ७१ करोड रुपैयाँ घाटा व्यहोर्नुपर्ने अवस्था रहेको जनाएको छ ।