जन्मदिनकै दिन चक्रे मिलन पक्राउ, ४७ जना गिरोहसहित नियन्त्रणमा

काठमाडौं । आपराधिक क्रियाकलापका कारण वर्षौंदेखि चर्चा बटुल्दै आएका मिलन गुरुङ उर्फ चक्रे मिलनलाई प्रहरीले उनको जन्मदिनकै दिन पक्राउ गरेको छ ।

साउन १५ गते राजधानीको महाराजगञ्जस्थित होटल साम्बालामा जन्मदिन मनाइरहेका चक्रे मिलनलाई विशेष प्रहरी अपरेसन मार्फत नियन्त्रणमा लिइएको हो । उनलाई सामाजिक सञ्जालमा जन्मदिनको शुभकामना दिनेहरू सक्रिय देखिए पनि साँझपख स्थिति फरक बन्यो ।

काठमाडौं प्रहरी परिसर र उपत्यका अपराध अनुसन्धान कार्यालयको संयुक्त टोलीले चलाएको विशेष अभियानका क्रममा चक्रे मिलन र उनका नजिकका सहयोगीहरू पक्राउमा परे ।

विशेष रूपमा राजधानीको शान्ति सुरक्षाको जिम्मेवारी सम्हालिरहेका एसएसपी विश्व अधिकारी स्वयं कमाण्डमा रहेर अपरेसनमा खटिएका थिए । अधिकारीको टोलीले होटल साम्बालाबाट चक्रे मिलनसहितको समूहलाई नियन्त्रणमा लिएको हो ।

यस अभियान अन्तर्गत ठमेल र महाराजगञ्ज क्षेत्रका विभिन्न स्थानबाट आपराधिक गतिविधिमा संलग्न ४७ जना पक्राउ गरिएको जिल्ला प्रहरी परिसर, काठमाडौंले जानकारी दिएको छ ।

चक्रे मिलन विगतमा पनि अनेकौं पटक आपराधिक आरोपमा पक्राउ परेका थिए तर कानुनी प्रक्रियाबाट छुट्दै आएका थिए । पछिल्लो समय राजधानीमा बढ्दो धम्की, फिरौती र संगठित आपराधिक गतिविधिका कारण प्रहरीले यो अपरेसनलाई उच्च प्राथमिकतामा राखेको हो ।

यसै क्रममा प्रहरीले बुधबार ठमेलबाट ‘सानुभाइ’ नामले चिनिने युवराज गुरुङलाई पनि पक्राउ गरेको छ । उनी प्रहरी इन्काउन्टरमा मारिएका कुमार श्रेष्ठ ‘घैंटे’का सहयोगी हुन् । उनलाई जिल्ला अदालतले चार दिनको म्याद थप गरी प्रहरीलाई अनुसन्धानका लागि अनुमति दिएको छ ।

पक्राउ परेका चक्रे मिलन र उनको समूहलाई आज अदालतमा पेश गरिने प्रहरीले जनाएको छ ।