तुल्सीपुर घटनामा एमालेको आपत्ति, ‘सूर्य’ झण्डा जलाउनु आचारसंहिताविरुद्ध

काठमाडौं । दाङको तुल्सीपुरमा नेकपा (एमाले) को चुनाव चिह्न ‘सूर्य’ अंकित झण्डा जलाइएको घटनाप्रति नेपाल कम्युनिस्ट पार्टी (एमाले) ले गम्भीर आपत्ति जनाएको छ । पार्टीले उक्त घटनालाई निर्वाचन आचारसंहिताको ठाडो उल्लंघन र लोकतान्त्रिक मूल्य–मान्यताविरुद्धको गतिविधि भनेको छ ।

केन्द्रीय कार्यालयबाट जारी प्रेस विज्ञप्तिमा राष्ट्रिय स्वतन्त्र पार्टी (रास्वपा) का कार्यकर्ताले बिहीबार राति तुल्सीपुरमा एमालेको झण्डा जलाएको उल्लेख गरिएको छ । एमालेले यसलाई योजनाबद्ध रूपमा गरिएको उच्छृङ्खल र अराजनीतिक हर्कतको संज्ञा दिएको छ ।

विज्ञप्तिमा अध्यक्ष केपी शर्मा ओली विरुद्ध अपाच्य शब्द प्रयोग गर्दै नाराबाजी गरिएको तथा महासचिव शङ्कर पोखरेलको गृहनगरमै यस्तो गतिविधि हुनु दुःखद रहेको उल्लेख छ । एमालेले दलीय प्रतिस्पर्धा लोकतन्त्रको सुन्दर पक्ष भए पनि प्रतिस्पर्धाको नाममा आस्था र विचारमाथि आक्रमण गर्नु अस्वीकार्य हुने जनाएको छ ।

एमालेले आफू अनुशासित पार्टी भएकाले घटनाबाट उत्तेजित नभएको स्पष्ट पार्दै संयमता कमजोरी नभएको जिकिर गरेको छ । साथै, संलग्न व्यक्तिहरूको पहिचान गरी तत्काल कानुनी कारबाही गर्न सम्बन्धित निकायसँग माग गरिएको छ ।

पार्टीले सरकार मतदातालाई भयरहित, निष्पक्ष र निर्भीक वातावरणमा मतदान गर्न सक्ने अवस्था सुनिश्चित गर्न असफल भएको हो कि भन्ने प्रश्नसमेत उठाएको छ । झण्डा जलाउने घटनाबारे निर्वाचन आयोगले सम्बन्धित दलसँग स्पष्टीकरण माग गरी जवाफ सार्वजनिक गर्नुपर्ने माग एमालेको छ ।

दोषीमाथि कानुनी कारबाही नगरिए त्यसबाट उत्पन्न हुने परिस्थितिको जिम्मेवारी सरकार, निर्वाचन आयोग र सम्बन्धित दलले नै वहन गर्नुपर्ने चेतावनीसमेत विज्ञप्तिमा उल्लेख गरिएको छ ।