मेयर साम्पाङको स्वास्थ्य मन्त्रालयलाई पत्रः “नगरको जग्गा फिर्ता गरिदिनुहोस्”

धरान । धरान उपमहानगरपालिकाका नगरप्रमुख हर्कराज साम्पाङले स्वास्थ्य तथा जनसंख्या मन्त्रालयलाई औपचारिक पत्र लेख्दै छाता चोकस्थित नगरको पुरानो अस्पताल रहेको जग्गा फिर्ता गरिदिन माग गरेका छन् ।

साम्पाङले बुधबार पठाएको पत्रमा धरान उपमहानगरपालिकाले आफ्नै नगर अस्पताल बनाउने योजना बनाएको उल्लेख गर्दै बीपी कोइराला स्वास्थ्य विज्ञान प्रतिष्ठानलाई दिएको सो जग्गा फिर्ता गरिनुपर्ने माग गरिएको छ ।

पत्रमा भनिएको छ, ‘छाता चोकमा रहेको पुरानो अस्पतालको जग्गा कुनै कुलङ्गारले दलालीमा भुलेर बीपी अस्पताललाई दिइ पठाए छ, थाहा भएन । यसरी नगरपालिकाको जग्गा लान पाइँदैन । Please फिर्ता गरिदिनु होला ।’

पत्रको प्रतिलिपि प्रधानमन्त्री तथा मन्त्रिपरिषद्को कार्यालय, मुख्यमन्त्री तथा मन्त्रिपरिषद्को कार्यालय विराटनगर र बीपी कोइराला स्वास्थ्य विज्ञान प्रतिष्ठानलाई समेत पठाइएको छ ।

अनौपचारिक शैलीमा लेखिएको यो पत्र सामाजिक सञ्जालमा सार्वजनिक भएको छ, जसमा साम्पाङले विगतझैं खुलेर धारणा राखेका छन् ।

धरान उपमहानगरपालिकाले सो जग्गा आफ्नो स्वामित्वमा ल्याएर नगरवासीका लागि सेवा केन्द्रित अस्पताल निर्माण गर्ने योजना अघि सारेको जनाइएको छ ।