महावीर पुनको आत्मकथा बिक्रीबाट १२ करोड संकलन, आविष्कार केन्द्रलाई सहयोग

झापा । डा. महावीर पुनको आत्मकथा ‘महावीर पुनः सम्झना, सपना र अविरल यात्रा’को बिक्रीबाट अहिलेसम्म १२ करोड रुपैयाँ संकलन भएको छ । राष्ट्रिय आविष्कार केन्द्रका अध्यक्ष डा. पुनका अनुसार संकलित सबै रकम केन्द्रको खातामा जम्मा भइसकेको छ ।

प्रत्येक प्रति ७५० रुपैयाँ पर्ने उक्त पुस्तकको २ लाख १८ हजार प्रति बिक्री भइसकेको पुनले जानकारी दिए । यो रकम वीरगञ्जस्थित औजार कारखाना र आविष्कार केन्द्रका अन्य प्रविधिमूलक कार्यक्रमहरूमा खर्च गरिनेछ ।

झापामा एक साता लामो अभियान
पुस्तक बिक्रीको प्रचारका लागि डा. पुन विगत एक सातादेखि झापामा छन् । उनको उपस्थितिमा बिर्तामोड, दमक, बुद्धशान्ति, बाह्रदशी लगायत विभिन्न पालिकाहरूमा पुस्तक खरिद अभियान तिव्र रूपमा चलिरहेको छ । संस्थागत र व्यक्तिगत स्तरमा पुस्तक किन्नेहरू बढिरहेका छन् ।

स्थानीय तह र संस्थाहरूको समर्थन
बिर्तामोड नगरपालिकाले एक कार्यक्रममार्फत ५० हजार रुपैयाँ बराबरको पुस्तक खरिद गरेको छ । नगर उपप्रमुख पवित्रा महतरा प्रसाईँले डा. पुनको अभियानलाई आत्मनिर्भर नेपालको दिशामा प्रेरणादायक पहल भन्दै समर्थन जनाइन् ।
सहारा नेपाल बचत तथा ऋण सहकारी संस्थाका प्रमुख कार्यकारी अधिकृत महेन्द्र गिरीले डा. पुनको देशप्रेम, मेहनत र वैज्ञानिक दृष्टिकोण अनुकरणीय भएको बताए ।

युवापुस्तालाई डा. पुनको सन्देश
एक कार्यक्रममा डा. पुनले युवाहरूलाई सामाजिक सञ्जालमा नेताहरूलाई गाली गर्नुभन्दा राष्ट्रका लागि प्रत्यक्ष योगदान गर्न आग्रह गरे । ‘गाली गरेर मात्रै परिवर्तन आउँदैन,’ उनले भने, ‘देशलाई अगाडि बढाउन आ–आफ्नो स्थानबाट केही न केही गर्नु आवश्यक छ ।’

आविष्कार केन्द्रको गतिविधि
डा. पुनका अनुसार राष्ट्रिय आविष्कार केन्द्रले हाल १५ प्रकारका कृषि उपकरण उत्पादन गरिरहेको छ । ती उपकरणहरू निकट भविष्यमा साना किसानहरूका लागि विशेष उपयोगी हुने विश्वास उनले व्यक्त गरे ।