दुर्गा प्रसाईंको रिट खारेज, बैंकले ऋण असुल गर्न बाटो खुल्यो

विराटनगर । बैंकविरुद्ध रिट दायर गरेका मेडिकल व्यवसायी दुर्गा प्रसाईंको निवेदन उच्च अदालत विराटनगर, इलाम इजलासले खारेज गरेको छ । यससँगै बैंकहरूले प्रसाईंबाट लिएको ऋण असुल गर्न प्रक्रिया अघि बढाउन पाउने भएका छन् ।

प्रसाईंले कुमारी बैंकको विर्तामोड शाखालगायत चार बैंकविरुद्ध निषेधाज्ञाको माग गर्दै रिट दायर गरेका थिए। तर मंगलबार मुख्य न्यायाधीश विपुल न्यौपाने र न्यायाधीश काजीबहादुर राईको इजलासले उक्त रिट खारेज गर्‍यो ।

प्रसाईंले पूर्वाञ्चल क्यान्सर अस्पताल सञ्चालनका लागि चार बैंकबाट झन्डै २ अर्ब ऋण लिएका थिए । पछिल्लो दुई वर्षदेखि उनले बैंक तथा वित्तीय संस्थाहरूबाट लिएको ऋण मिनाहा गराउन प्रयास गर्दै आएका थिए । उनका गतिविधिका कारण ग्रामीण क्षेत्रका लघुवित्त संस्थाहरूको ऋण लगानी र असुलीमा प्रत्यक्ष असर परेको थियो ।

इलाम इजलासले रिट खारेज गर्ने क्रममा भनेको छ, ‘रिट निवेदकले विपक्षी बैंकहरूमाथि कानुनी उपचारका लागि साधारण क्षेत्राधिकार अन्तरगत प्रक्रिया अवलम्बन गरिसकेका छन् । साथै, मिति २०८०-१-१० को पत्रको प्रयोजन समाप्त भइसकेकाले निवेदनका आधारमा माग गरिएको आदेश जारी गर्नुपर्ने अवस्था देखिएन ।’

प्रसाईंले २०८० असार ८ गते चार बैंकलाई प्रतिवादी बनाउँदै रिट दायर गरेका थिए । असार १० गते इलाम इजलासले कारण देखाऊ आदेश जारी गरे पनि यो रिटको सुनुवाइ नौ पटक स्थगित भएको थियो । मंगलबारको फैसलाले बैंकलाई ऋण असुली प्रक्रिया अघि बढाउन मार्गप्रशस्त गरेको हो ।

फैसलापछि अब प्रसाईंले लिएको ऋण नतिरे बैंकहरूले धितो लिलामीबाट रकम असुल गर्न सक्नेछन् ।

दुर्गा प्रसाईंलाई हाल विभिन्न कानुनी समस्याहरूले घेरेको छ । बी एन्ड सी मेडिकल कलेज सञ्चालनका लागि सर्वोच्च अदालतले गत चैतमा बाटो खोले पनि, उनलाई संगठित अपराध र अपराधिक लाभका मुद्दामा प्रहरीले हिरासतमा राखेको छ ।

गत मंसिर ४ गते विद्युतीय कारोबार ऐन अन्तर्गत पक्राउ परेका प्रसाईंमाथि ४० हजार धरौटीमा रिहा गर्ने आदेश भए पनि संगठित अपराधका थप आरोपमा हिरासतमै छन् ।

उनले फर्जी कागजातका आधारमा प्रधानमन्त्री केपी शर्मा ओलीविरुद्ध अफवाह फैलाएको आरोपमा पनि अनुसन्धानको सामना गरिरहेका छन् ।