झापामा फेरि हात्तीको आक्रमण, शौचालय जान निस्किएका लिम्बूको ज्यान गयो

झापा । झापाको बिर्तामोडमा जंगली हात्तीको आक्रमणबाट एक व्यक्तिको ज्यान गएको छ ।

बिर्तामोड नगरपालिका–७ निवासी ५९ वर्षीय लोकप्रसाद लिम्बूको बिहीबार बिहानको समयमा मृत्यु भएको जिल्ला प्रहरी कार्यालय झापाले जनाएको छ ।

प्रहरीका अनुसार बिहान करिब ३ बजेको समयमा शौचालयतर्फ जाँदै गर्दा लिम्बूमाथि हात्तीले आक्रमण गरेको थियो । गम्भीर घाइते भएका उनलाई उद्धार गर्न नपाउँदै घटनास्थलमै मृत्यु भएको हो ।

यसअघि असार ६ गते मेचीनगरमा समेत हात्तीको आक्रमणबाट एक जनाले ज्यान गुमाएका थिए ।

प्रत्येक वर्ष झापामा हात्ती आक्रमणका घटना बढ्दै गइरहेका छन् । चालु आर्थिक वर्षमा मात्रै जंगली हात्तीको आक्रमणबाट जिल्लामा ६ जनाको ज्यान गइसकेको प्रहरीले जनाएको छ ।