संसदको प्रभावकारिता बढाउन संसदीय अभ्यासमा सुधार आवश्यकः उपसभामुख राना मगर

काठमाडौं । उपसभामुख इन्दिरा राना मगरले संसद्‌को प्रभावकारिता, पारदर्शिता र जवाफदेहिता सुनिश्चित गर्न संसदीय अभ्यासमा आमूल सुधारको खाँचो झनै बढेको बताएकी छन् । संसद् दिवस २०८२ को अवसरमा दिइएको शुभकामना सन्देशमा उनले संसद्लाई जनउत्तरदायी बनाउन सबै पक्ष गम्भीर भएर लाग्नुपर्ने धारणा राखेकी हुन् ।

‘संसद् जनताको चाहना र अपेक्षाको प्रतिबिम्ब हो । तर अहिले संसद्‌को जनप्रतिनिधिमूलक भूमिका कत्तिको प्रभावकारी छ भन्ने विषय बहसको केन्द्रमा रहेको छ,’ सन्देशमा भनिएको छ, ‘संसद् कमजोर हुँदा जनताको आवाज दबिन्छ। त्यसैले संसदीय सर्वोच्चताको प्रत्याभूति गर्न सबैले भूमिका खेल्न जरुरी छ ।’

उपसभामुख राना मगरले लोकतान्त्रिक मूल्य र मान्यताका संरक्षण र सुदृढीकरणमा संसद् दिवसले नयाँ ऊर्जा दिने विश्वास व्यक्त गरिन् । ‘संसद् दिवसले संघीय संसद्‌का वर्तमान तथा पूर्वसांसद, संविधानसभा सदस्य, संसद् सचिवालयका कर्मचारी र सम्पूर्ण नेपाली जनतालाई लोकतन्त्रको रक्षामा जुट्न प्रेरणा मिलोस् भन्ने शुभेच्छा व्यक्त गर्दछु,’ उनले उल्लेख गरेकी छन् ।

नेपालमा पहिलोपटक विसं २०१६ असार १६ गते संसद्को बैठक बसेको स्मरणमा प्रत्येक वर्ष यही दिन संसद् दिवस मनाइन्छ । दिवसको अवसरमा उपसभामुख रानाले प्रजातन्त्र स्थापनार्थ प्राण उत्सर्ग गर्ने शहीदहरूप्रति श्रद्धाञ्जली अर्पण गर्दै, आन्दोलनमा सहभागी जनताको आकाङ्क्षा पूरा गर्ने दिशामा सबै राजनीतिक शक्ति जिम्मेवार बन्नुपर्नेमा जोड दिइन् ।

‘विधायिका लोकतान्त्रिक शासन व्यवस्थाको मूल आधार हो,’ राना मगरले भनिन्, ‘संसद् नागरिकको आवाज, चाहना र आवश्यकता बोकेको संस्था हो । यसले नीति निर्माण, कानुन व्यवस्था, योजना तय र कार्यान्वयन अनुगमनमार्फत शासन प्रणालीलाई जीवन्त बनाउने जिम्मेवारी निर्वाह गर्छ ।’