देशभर ११ मुख्य राजमार्ग अवरुद्ध, पहिरोका कारण यातायात प्रभावित

काठमाडौं । देशभर लगातारको वर्षाले जनजीवन प्रभावित बनाउनुका साथै सडक यातायात प्रणालीसमेत अस्तव्यस्त पारेको छ । नेपाल प्रहरीको अनुसार, बिहीबार बिहान ९ः१६ बजेसम्म देशका विभिन्न भागमा पर्ने ११ वटा मुख्य राजमार्ग बाढी र पहिरोका कारण अवरुद्ध भएका छन् ।

अवरुद्ध सडकमध्ये धनकुटा, सिन्धुपाल्चोक, काभ्रेपलाञ्चोक, चितवन, नवलपरासी, म्याग्दी, गुल्मी, जुम्ला र डोटी जिल्लाका सडकहरू मुख्य रूपमा प्रभावित भएका छन् । तीमध्ये ६ वटा सडक पूर्णरूपमा बन्द छन् भने बाँकी ५ वटा सडक एकतर्फी मात्र सञ्चालनमा रहेका छन् ।

प्रहरीका अनुसार पहिरोको जोखिम अझै टरिसकेको छैन, जसका कारण उद्धार तथा मर्मत कार्यमा कठिनाइ भइरहेको छ । यद्यपि, सडक डिभिजन कार्यालय, सुरक्षाकर्मी र स्थानीयबासीको सहयोगमा अवरुद्ध सडक खुलाउने प्रयास तीव्र पारिएको बताइएको छ ।

यस वर्षा याममा अपेक्षाभन्दा बढी पानी परेकाले देशका पहाडी र हिमाली जिल्लामा पहिरोको जोखिम उच्च छ ।