कासम ब्रिगेडले सार्वजनिक गर्‍यो इजरायली बन्धकहरूको ‘बिदाइ तस्बिर’, नेपाली विपिन जोशी पनि तस्बिरमा

गाजा । इजरायली सेनाले गाजाको एक प्रमुख सहरमा घेराबन्दी गर्दै सैन्य आक्रमण तीव्र बनाएको बेला, हमासको सशस्त्र शाखा कासम ब्रिगेडले ४८ जना इजरायली बन्धकहरूको सामूहिक ‘बिदाइ तस्बिर’ सार्वजनिक गरेको छ । शनिबार सार्वजनिक गरिएको तस्बिरमा नेपाली युवा विपिन जोशीको अनुहार पनि देखिएको पुष्टि भएको छ ।

सामूहिक तस्बिरमा जीवित र मृतक दुवै बन्धकहरूलाई समावेश गरिएको देखिन्छ । सो तस्बिरसँगै “रोन अरद” भनेर क्याप्सन राखिएको थियो, जसले सन् १९८६ मा लेबनानमा बेपत्ता भएका इजरायली वायुसेनाका पाइलटलाई संकेत गर्छ । यो संकेतको अर्थ, लामो समयदेखि बेपत्ता वा मारिएका बन्धकहरूको अवस्था दर्शाउने चेतावनीको रूपमा लिइएको छ ।

नेतन्याहूमाथि आरोप, समझौता अस्वीकार गरेको दाबी
कासम ब्रिगेडले विज्ञप्तिमार्फत इजरायली प्रधानमन्त्री बेन्जामिन नेतन्याहूले बन्धक मुक्तिसम्बन्धी प्रस्तावहरू अस्वीकार गरेको आरोप लगाएको छ । साथै, इजरायली सेनापति अयाल जामरले गाजामा तथाकथित ‘विजय योजना’ अघि बढाएको भन्दै आक्रोश व्यक्त गरिएको छ ।

इजरायलको दाबीः अझै २० जना बन्धक जीवित
इजरायली अधिकारीहरूले हालसम्म करिब २० जना बन्धकहरू गाजामै जीवित रहेको दाबी गरिरहेका छन् । तर, अमेरिकाका पूर्वराष्ट्रपति डोनाल्ड ट्रम्पले भने तीमध्ये “२० भन्दा कम मात्र” जीवित हुनसक्ने टिप्पणी गरेका छन् । प्रधानमन्त्री नेतन्याहूले भने बारम्बार सबै बन्धकहरूलाई सकुशल फर्काउने र हमासलाई पूर्ण रूपमा नष्ट गर्ने प्रतिबद्धता दोहोर्याउँदै आएका छन् ।

गाजामा भारी मानवीय क्षति
गाजा युद्ध सुरु भएदेखि हालसम्म ६५ हजारभन्दा बढी प्यालेस्टिनीहरू मारिएका र लाखौं घाइते भएको गाजाको स्वास्थ्य मन्त्रालयले जानकारी दिएको छ । हमासले भने इजरायली बमबारीकै कारण कैयौं बन्धकहरूको ज्यान गएको चेतावनी दिँदै आएको छ ।

यस तस्बिर सार्वजनिक घटनाले गाजा युद्ध अझ भयावह मोडमा प्रवेश गरेको संकेत दिएको छ । बन्धकहरूको सुरक्षाको विषयमा चासो बढ्दै गइरहेका बेला, युद्ध रोक्न अन्तर्राष्ट्रिय दवाव पनि तीव्र बन्दै गएको छ ।