बिहारमा मन्त्रीमाथि गाउँलेको ढुंगामुढा, ज्यान जोगाउन दौडिए एक किलोमिटर

काठमाडौं । भारतको बिहार राज्यमा बुधबार एउटा नाटकीय घटना घटेको छ । नालन्दा जिल्लाको हिल्सा प्रहरी क्षेत्रअन्तर्गत मलावन गाउँमा पुगेका मन्त्री श्रवण कुमारमाथि स्थानीयले ढुंगामुढा गरेका छन् ।

तीन दिनअघि भएको सवारी दुर्घटनामा मलावनका नौ जनाको ज्यान गएको थियो । त्यसैका पीडित परिवारलाई भेटेर सान्त्वना दिन मन्त्री श्रवण कुमार र स्थानीय विधायक गाउँ पुगेका थिए ।

सान्त्वना भेटघाटपछि फर्किन खोज्दा गाउँलेहरूले मन्त्री र विधायकलाई अझै केही समय बस्न आग्रह गरे । तर मन्त्रीले अन्य कार्यक्रममा जानुपर्ने भन्दै गाउँ छाड्न खोजेपछि असन्तुष्टि बढ्यो ।

गाउँलेहरूले क्षतिपूर्तिको माग उठाएपछि विवाद चर्कियो । भीडले मन्त्रीसहितको टोलीलाई घेरेर ढुंगामुढा गर्न थाले । घटनामा मन्त्रीका अंगरक्षकसहित केही व्यक्ति घाइते भएका छन् ।

स्थिति नियन्त्रणमा लिन ठूलो संख्यामा प्रहरी र सुरक्षाकर्मी परिचालन गरिएको छ । भारतीय सञ्चारमाध्यमका अनुसार ज्यान जोगाउन मन्त्री श्रवण कुमार झन्डै एक किलोमिटरसम्म दौडिन बाध्य भएका थिए ।