बुसानमा ट्रम्प–सी भेट सकियो, अनुमानभन्दा छोटो बैठकमा व्यापार प्रमुख एजेन्डा

बुसान । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच दक्षिण कोरियाको बुसानमा भएको भेटवार्ता करिब एक घण्टा ४० मिनेटमै समाप्त भएको छ ।

चिनियाँ सञ्चारमाध्यम सीसीटीभीका अनुसार दुवै नेता बैठक सकेर भेटघाट स्थलबाट बाहिरिँदा आ–आफ्नो लिमोजिनमा चढ्दै गरेका देखिएका थिए ।

ट्रम्पले यसअघि यो बैठक चार घण्टासम्म चल्न सक्ने बताएका थिए, तर वास्तविक वार्ता अनुमानित समयभन्दा धेरै छोटो भयो । यो भेट एसिया–प्यासिफिक इकोनोमिक कोअपरेसन (एपेक) शिखर सम्मेलनको छेउमा सम्पन्न भएको हो ।

बैठकमा दुई देशबीच मुख्यतया व्यापार सम्झौता र द्विपक्षीय आर्थिक सम्बन्धका विषयमा छलफल भएको बताइएको छ ।

वार्तामा दुवैतर्फबाट सात–सात जना अधिकारी सहभागी थिए । ट्रम्पसँग विदेश मन्त्री मार्को रुबियो, अमेरिकी व्यापार प्रतिनिधि जेमिसन ग्रीर, ट्रेजरी सचिव स्कट बेस्सेन्ट, वाणिज्य सचिव होवार्ड लट्नक, चीफ अफ स्टाफ सुसी वाइल्स र चीनका लागि अमेरिकी राजदूत डेविड पर्ड्यू सहभागी थिए ।

त्यस्तै, चीनतर्फबाट राष्ट्रपति सीसँग चीफ अफ स्टाफ काई क्यूई, विदेश मन्त्री वाङ यी, उप–विदेश मन्त्री मा झाओक्सु, उप–प्रधानमन्त्री हे लिफेङ, वाणिज्य मन्त्री वाङ वेनताओ र राष्ट्रिय विकास तथा सुधार आयोगका अध्यक्ष झेङ शानजी उपस्थित थिए । (एजेन्सी)