गजामा सहायता खोज्दै भेला भएका सर्वसाधारणमाथि गोली वर्षा, ६७ जनाको ज्यान गयो

काठमाडौं । मानवीय सहायता प्राप्त गर्न जम्मा भएका सर्वसाधारणमाथि इजरायली सेनाले अन्धाधुन्ध गोली प्रहार गर्दा गाजाको उत्तर क्षेत्रमा कम्तीमा ६७ जनाको ज्यान गएको छ ।

अन्तर्राष्ट्रिय समाचार संस्था रोयटर्सले गाजास्थित स्वास्थ्य मन्त्रालयलाई उद्धृत गर्दै आइतबार घटेको घटनालाई मानवीय सहायता वितरणको क्रममा हालसम्मकै सबैभन्दा ठूलो जनधनको क्षति भएको जनाएको छ ।

गाजामा पछिल्ला दिनहरू यता भोकमरीले भयावह अवस्था सिर्जना गरिरहेको छ । पर्याप्त मात्रामा सहायता सामग्री नपुगेका कारण हजारौं नागरिक भोकको चपेटामा छन् ।

‘हामीले सुकेको शरीरमा हड्डी मात्र बाँकी रहेका सयौं मानिसहरूलाई मृत्युको नजिक देखिरहेका छौँ,’ गाजाको स्वास्थ्य मन्त्रालयको भनाइ छ ।

सहायता ट्रकलाई घेरेपछि सेनाको गोली
घटनास्थलमा उपस्थित प्रत्यक्षदर्शीहरूका अनुसार जब मानवीय सहायता बोकेको ट्रक देखा पर्छ, मानिसहरू हतारिँदै त्यसलाई घेर्न पुग्छन् । भिड अनियन्त्रित बन्न थालेपछि इजरायली सेनाले गोली चलाउने गरेको समाचारमा जनाइएको छ ।

आइतबारको घटनाबाहेक शनिबार मात्रै सहायता केन्द्र नजिकै भएको अर्को आक्रमणमा ३६ जनाको ज्यान गएको थियो । त्यसैगरी, आइतबार गाजाको अर्को क्षेत्रमा सहायताका लागि जम्मा भएका ६ जना पनि इजरायली सेनाको गोलीबाट मारिएको रिपोर्ट छ ।

इजरायली सेनाको गोली प्रहारका कारण पछिल्ला तीन दिनमा कूल ९० जनाको मृत्यु भएको बताइएको छ ।

इसराइलको आरोप अस्वीकार
इजरायली सेनाले भने गाजाको स्वास्थ्य मन्त्रालयले दिएको मृतक संख्या अतिरञ्जित भएको र घटनाबारे गरिएको दाबीहरू सत्य नभएको बताएको छ । तर, अन्तर्राष्ट्रिय मानवअधिकार संगठनहरू र सहायता निकायहरूले भने गाजामा भइरहेका घटनाप्रति गहिरो चिन्ता व्यक्त गर्दै आएका छन् ।

बालबालिकामा भयावह प्रभाव
गाजास्थित स्वास्थ्य मन्त्रालयका अनुसार युद्ध सुरु भएयता ७१ बालबालिकाले भोककै कारण ज्यान गुमाइसकेका छन् । साथै करिब ६० हजार बालबालिकामा कुपोषणको समस्या देखिएको छ ।

आइतबार मात्र भोकका कारण १८ जनाको मृत्यु भएको विवरण छ ।

सहायता रोकिँदा थप संकट
संयुक्त राष्ट्रसंघीय शरणार्थी एजेन्सी यूएनआरडब्लूएले तीन महिनासम्म पुग्ने खाद्यान्न मौज्दात रहेको बताउँदै इसराइललाई सहायता प्रवेश अनुमति दिन आग्रह गरेको छ । ‘हामीसँग खाद्यान्न छ, तर वितरण गर्न सकिने वातावरण छैन,’ एजेन्सीले रोयटर्समार्फत भनेको छ।

इसराइलले भने सहायता प्रवेशका विषयलाई संवेदनशील रूपमा लिँदै आएको र अन्तर्राष्ट्रिय साझेदारहरूसँग समन्वयमा काम भइरहेको दाबी गरेको छ ।

यता, कतारमा इसराइल र हमासबीच युद्धविरामका लागि अप्रत्यक्ष वार्ता जारी रहेको छ । तर, हमासले गाजामा भोकमरीको चपेटामा परेकाहरूको हत्या जारी रहे युद्धविराम प्रक्रिया नै धरापमा पर्ने चेतावनी दिएको छ ।