सुनचाँदीको मूल्यमा फेरि उछाल, सुनले बनायो नयाँ ऐतिहासिक रेकर्ड

काठमान्डु । नेपाली बजारमा सोमबार पनि सुनको मूल्यले निरन्तर नयाँ रेकर्ड कायम राखेको छ । अघिल्लो दिनको तुलनामा सुन प्रतितोला १ हजार ९ सय रुपैयाँले बढ्दै हालसम्मकै उच्च विन्दुमा पुगेको छ ।

नेपाल सुनचाँदी व्यवसायी महासंघका अनुसार सोमबार सुनको मूल्य प्रतितोला २ लाख ६० हजार ७ सय रुपैयाँ निर्धारण गरिएको छ । यो मूल्य हालसम्मकै उच्च मानिएको छ ।

यसअघि आइतबार मात्रै सुनको मूल्यले असोज ३१ गतेको पुरानो रेकर्ड तोडेको थियो । आइतबार सुन प्रतितोला २ लाख ५८ हजार ८ सय रुपैयाँमा कारोबार भएको थियो भने त्यसअघि असोज ३१ गते सुनको मूल्य २ लाख ५८ हजार रुपैयाँ पुगेको थियो ।

यता, चाँदीको मूल्यमा पनि वृद्धि देखिएको छ । सोमबार चाँदी प्रतितोला ४५ रुपैयाँले बढ्दै ३ हजार ८७० रुपैयाँमा कारोबार भएको छ । अघिल्लो दिन चाँदी ३ हजार ८२५ रुपैयाँ प्रतितोलामा किनबेच भएको थियो ।

यसअघि चाँदीले गत शुक्रबार हालसम्मकै उच्च मूल्य ३ हजार ९०५ रुपैयाँको रेकर्ड बनाइसकेको छ ।