एटिएमबाट हुने नगद कारोबारको सीमा कटौती, दैनिक ५० हजार मात्र झिक्न पाइने

काठमाडौं । नेपाल राष्ट्र बैंकले एटिएममार्फत हुने नगद कारोबारको सीमा कटौती गरेको छ । शुक्रबार भुक्तानी प्रणालीसम्बन्धी संस्थाहरूलाई एकीकृत निर्देशन जारी गर्दै प्रिपेड, डेबिट र क्रेडिट कार्ड प्रयोगकर्ताहरूका लागि एटिएम निकासीको नयाँ सीमा तोकिएको हो ।

नयाँ व्यवस्था अनुसार एटिएमबाट एक दिनमा अधिकतम ५० हजार रुपैयाँसम्म मात्र झिक्न पाइनेछ । प्रतिकारोबारको सीमा २० हजार रुपैयाँ निर्धारण गरिएको छ । यससँगै मासिक निकासीको सीमा पनि घटाइँदै ३ लाख रुपैयाँमा सीमित गरिएको छ ।

यसअघि प्रयोगकर्ताले प्रतिकारोबार २५ हजार रुपैयाँ, प्रतिदिन १ लाख रुपैयाँ र प्रतिमहिना ४ लाख रुपैयाँसम्म झिक्न पाउँथे । नयाँ निर्देशन लागू भएलगत्तै यी सबै सीमा स्वतः परिमार्जित हुनेछन् ।

डिजिटल कारोबारलाई प्राथमिकता
राष्ट्र बैंकले नगद प्रयोग घटाएर विद्युतीय माध्यमबाट हुने भुक्तानीलाई प्रोत्साहन गर्न यो कदम चालेको जनाएको छ । बैंकको मान्यतामा डिजिटल पेमेन्ट प्रणालीलाई बलियो बनाउन तथा अवाञ्छित नगदी प्रवाह नियन्त्रण गर्न एटिएम निकासी सीमा समायोजन आवश्यक देखिएको हो ।

बैंक तथा कार्ड प्रयोगकर्तालाई तयारीपूर्वक अघि बढ्न आग्रह
निर्देशनसँगै कार्ड सेवा प्रदायक संस्था तथा बैंकहरूलाई नयाँ सीमा अनुसार प्रविधिगत तथा सेवा अभिमुख समायोजन गर्न भनिएको छ । साथै, कार्ड प्रयोगकर्ताहरूलाई आवश्यक खर्च र वैकल्पिक डिजिटल भुक्तानी माध्यमबारे सजग हुन आग्रह गरिएको छ ।

राष्ट्र बैंकले निकट भविष्यमै अनलाइन ट्रान्जेक्सन तथा क्यूआर पेमेन्ट जस्ता सेवा अझ विस्तार र सुरक्षित बनाउन पनि तयारी भइरहेको जनाएको छ ।